سکیورٹی فورسز نے انکاؤنٹر کے مقام سے اے کے 47، سیلف لوڈنگ رائفل، سیمی آٹومیٹک کاربائن، تین 303 رائفلس اور دیسی ساختہ ہتھیار برآمد کیے ہیں۔ ان ماؤنوازوں کی شناخت ابھی نہیں ہوپائی ہے۔ تاہم ان میں ایک سینئر کیڈر کا ماؤنواز شامل تھا جس کے پاس اے کے 47 رائفل تھی۔
ان ہلاک شدہ ماؤنوازوں میں خواتین بھی شامل ہیں۔ پولیس ذرائع کے مطابق ممپا پولیس اسٹیشن کی حدود میں تلاشی مہم کے دوران گرے ہونڈس کی ٹیموں کے ساتھ ماؤنوازوں کی لڑائی شروع ہوئی۔ کچھ وقت تک گرے ہونڈس کی ٹیموں اور پولیس کے درمیان فائرنگ کا تبادلہ ہوتا رہا۔
سکیورٹی فورسز نے فائرنگ کے رک جانے کے بعد لاشوں کو برآمد کیا۔ کئی ماؤنواز زخمی بھی ہوئے ہیں۔ ان ہلاک ہونے والے ماؤنوازوں میں دو کا تعلق تلنگانہ سے ہے۔ اس علاقہ کی فضائی نگرانی ایک ہیلی کاپٹر کے ذریعہ کی جارہی ہے تاکہ یہ پتہ چلایا جاسکے کہ آیا مزید ماؤنواز تو یہاں روپوش نہیں ہیں۔
