سرینگر میں پیر کو دی گئی 'عیدگاہ چلو کال' کے پیش نظر ضلع انتظامیہ کی جانب سے عیدگاہ سرینگر کے اردگرد سخت بندشیں عائد کی گئی ہیں، جب کہ اس دوران پولیس اور سی آر ایف کی بھاری نفری تعینات کی گئی ہے۔
عیدگاہ اور مزار شہداء کے اردگرد تعینات بھاری نفری نے عیدگاہ کی جانب جانے والے تمام راستوں کو خار دار تار لگاکر بند کر رکھا ہے، کسی کو بھی ادھر جانے کی اجازت نہیں ہے۔
کشمیر کے سب سے بزرگ علیحدگی پسند رہنما سید علی شاہ گیلانی کی وفات کے پانچویں روز بھی وادی کے مختلف علاقوں میں بندشیں عائد ہیں۔ ان کی رہائشی علاقے حیدرپورہ میں بھی سخت بندشیں ہیں، ساتھ ہی جس قبرستان میں سید علی گیلانی مرحوم کو دفن کیا گیا ہے اسے بھی سکیورٹی فورسز کی نگرانی میں رکھا گیا ہے۔
مزید پڑھیں: سید علی شاہ گیلانی کی وفات کے پانچویں روز بندشوں میں نرمی
سید علی گیلانی کی وفات کے بعد وادی بھر میں مواصلاتی نظام کو بھی بند کیا گیا تھا۔ اس کے بعد اگرچہ براڈ بینڈ انٹرنیٹ سروسز اور موبائل کالنگ کو بحال کیا گیا تھا تاہم موبائل انٹرنیٹ ابھی بھی بند ہے۔
