امت شاہ کا دعوی: جموں و کشمیر میں ایک انچ پر بھی کرفیو نہیں

وزیر داخلہ امت شاہ نے دعوی کیا ہے کہ جموں و کشمیر میں کرفیو نہیں ہے جبکہ نیشنل کانفرنس کے سربراہ فاروق عبداللہ، سابق وزیراعلی عمر عبداللہ اور پی ڈی پی کی صدر محبوبہ مفتی کی رہائی کو لیکر انہوں نے کہا کہ 'ان کو مجھے تھوڑی نہ چھوڑنا ہے، یہ کام انتظامیہ کا ہے، جب انہیں لگے گا، وہ فیصلہ کر لیں گے۔'

امت شاہ نے یہ تمام باتیں سنہ 2020 کے اپنے پہلے انٹرویو میں کہی۔ وزیر داخلہ نے کہا کہ جموں و کشمیر کے حالات اب قابو میں ہیں۔

واضح رہے کہ جموں و کشمیر میں دفعہ 370 کی منسوخی کے اعلان کے ساتھ ہی وادی کی علیحدگی پسند رہنماؤں اور متعدد ہند نواز رہنماؤں کو حراست میں لیا گیا تھا۔ حال ہی میں پانچ رہنماؤں کو تقریبا چار ماہ بعد چھوڑا گیا لیکن ان تینوں اعلی رہنماؤں کو سکیورٹی وجوہات کے سبب فی الحال نظربند کر کے رکھا گیا ہے۔