پولیس کے مطابق، آج دوپہر سرینگر کے مصروف بازار ہری سنگھ ہائی اسٹریٹ علاقے میں مبینہ عسکریت پسندوں نے سسشتر سیما بل یا ایس ایس بی کی ایک گاڑی کی جانب ایک گرینیڈ پھینکا۔
گرینیڈ گاڑی کے نزدیک گر کر بھٹ گیا جس سے کم از کم تین راہگیر معمولی طور پر زخمی ہوئے ہیں جن کو نزدیکی ہسپتال منتقل کیا گیا ہے۔ کسی جانی نقصان کی اطلاع موصول نہیں ہوئی ہے۔
گرینیڈ سے کئی گاڑیوں کو بھی نقصان پہنچا ہے۔
یہ حملے اس وقت ہوا جب ایک نزدیکی علاقے میں کانگریس کے سینئر رہنما راہل گاندھی اور سابق وزیر اعلیٰ غلام نبی آزاد ایک تقریب سے خطاب کررہے تھے۔
سینٹرل ریزرو پولیس فورس کے ایک افسر نے ای ٹی وی بھارت کو بتایا کہ دھماکے سے کوئی نقصان نہیں ہوا۔ انہوں نے کہا کہ حملہ آوروں کو گرفتار کرنے کیلئے علاقے کو گھیر لیا گیا۔
اسپتال ذرائع کے مطابق متعدد افراد دھماکے کے بعد علاج کیلئے اسپتال لائے گئے جن میں کئی ایک کو معمولی چوٹیں آئی تھیں۔
سرینگر کے مرکزی علاقے میں ہونیوالا دھماکہ سیکیورٹی فورسز کیلئے ایک چیلنج ہے کیونہ یوم آزادی کے پس منظر میں علاقے میں سیکیورٹی کا زبردست بندوبست کیا گیا ہے۔ حکام نے لالچوک کے مرکزی علاقے میں قائم گھنٹہ گھر پر ترنگی روشنی لگائی ہے۔
