مہاراشٹر کے شہر مالیگاؤں میں واقع گرنا پل سے پانی میں کود کر 22 سالہ نوجوان نے خودکشی کرلی
مالیگاؤں: 22 سالہ نوجوان نے کی خودکشی ریاست مہاراشٹر کے شہر مالیگاؤں میں بے روزگاری اور معاشی تنگی سے پریشان ہوکر ترنال راجندر (22) سالہ ساکن سوندانہ نے مالیگاؤں میں واقع گرنا پل سے پانی میں کود کرخودکشی کرلی۔تفصیلات کے مطابق نوجوان کی لاش کل دوپہر سے تلاش کی جارہی تھی لیکن پانی کی گہرائی زیادہ ہونے کی وجہ سے مقامی غوطہ خوروں کو لاش تلاش کرنے میں مشکل در پیش آرہی تھی۔ معاملے کی اطلاع ہوتے ہی سٹانہ پولس اسٹیشن کے پی آئی نے فائر بریگیڈ محکمہ کے انچارج سنجئے پوار سے رابطہ کیا اور پورے معاملات کی خبر دی۔اطلاع ملتے ہی سنجئے پوار نے فائر بریگیڈ محکمہ کے ماہر غوطہ خور شکیل تیراک کو جائے حادثہ پر روانہ کیا۔
واضح رہے کہ شکیل تیراک ناسک ضلع کے ماہر تیراکی ہیں۔ انہوں نے اپنی سروس میں پورے ناسک ضلع اور اطراف کے دیہادتوں کے تالاب، کنویں اور ندیوں سے کئی لوگوں کو بچایا ہے اور ان گنت لوگوں کی لاش کو پانی سے نکالا ہے۔ شکیل تیراک نے بڑی جانفشانی سے کئی فٹ گہرے پانی سے جھاڑیوں میں پھنسی نوجوان کی لاش کو باہر نکالا اور پوسٹ مارٹم اور تمام قانونی مراحل مکمل ہونے کے بعد لاش کو اہل خانہ کے حوالے کردیا گیا۔
