اترپردیش کے ضلع مظفرنگر میں عالمی یوم فوٹوگرافی کے موقع آل انڈیا فوٹوگرافر فاؤنڈیشن کے ارکان کلکٹریٹ کے احاطہ میں جمع ہوئے اور مختلف مطالبات کو لیکر ایک میمورنڈم ضلع انتظامیہ کے حوالہ کیا۔
دنیا بھر میں آج ورلڈ فوٹو گرافی ڈے منایا جا رہا ہے جس میں تصویر نگار بڑھ چڑھ کر حصہ لے رہے ہیں۔ عالمی یوم فوٹوگرافی بین الاقوامی سطح پر ہر سال 19 اگست کو منایا جاتا ہے جس کا مقصد فوٹوگرافی کے فن کو ترقی دینا اور دنیا کے دلفریب و حسین مناظر کو کیمرے کی آنکھ میں قید کرکے دنیا کے سامنے پیش کرنا ہے۔ وہیں ورلڈ فوٹو گرافی ڈے ان تمام فوٹو گرافرز کے لیے جو اپنے فن کا باقاعدہ آغاز کرنا چاہتے ہیں ان کےلیے ایک پلیٹ فارم فراہم کرتا ہے جبکہ وہ اپنی کھینچی ہوئی تصویر کے ذریعہ اپنے فن کا مظاہرہ دنیا کے سامنے کرسکتے ہیں۔ فوٹو گرافر خصوصی لمحات کو تصویروں میں قید کرلیتا ہے اور انہیں ہمیشہ کےلیے یادگار بنادیتا ہے۔ فوٹو گرافر کی حوصلہ افزائی کےلیے یہ دن منایا جاتا ہے۔
یہ بھی پڑھیں:
عالمی یوم فوٹوگرافی: بارہ بنکی میں تقریب کا انعقاد
اس سلسلہ میں آج آل انڈیا فوٹوگرافر فاؤنڈیشن کے قومی صدر نریندر کشیپ کی کال پر مظفرنگر میں ضلع صدر اظہار انصاری نے اپنی ٹیم کے ساتھ اترپردیش کے وزیراعلی کے نام ایک میمورنڈم ضلع انتظامیہ کو پیش کیا۔ اس موقع پر انہوں نے کہا کہ ہمارا مطالبہ ہے کہ فوٹو گرافی کو آرٹ کا درجہ دیا جانا چاہئے اور حکومت کی اسکیموں میں فوٹوگرافرز کو بھی شامل کیا جانا چاہئے۔ انہوں نے حکومت سے مطالبہ کیا کہ 60 برس کی عمر کے فوٹوگرافرس کو پنشن دیا جانا چاہئے۔ انہوں نے فوٹوگرافرز کو قرض فراہم کرنے اور ایکسیڈینٹ میڈیکل اسکیم کا فائدہ بھی دینے کا مطالبہ کیا۔
