سماج وادی پارٹی (ایس پی) کی سابقہ حکومت میں کابینی وزیر رہے گایتری پرساد پرجاپتی کو اجتماعی عصمت دری معاملے میں جمعہ کو عدالت نے عمر قید اور دو لاکھ روپے کے جرمانہ کی سزا سنائی ہے۔
ایم پی اور ایم ایل اے سے منسلک جرائم معاملات کی لکھنو میں واقع خصوصی عدالت کی طرف سے اس معاملہ میں پرجاپتی کے ساتھ دو دیگر قصورواروں کو بھی عمر قید اور دو دو لاکھ روپے جرمانہ کی سزا سنائی گئی ہے۔
خیال رہے کہ بدھ کو ہی عدالت کے خصوصی جج پون کمار رائے پرجاپتی کے علاوہ دو دیگر ملزمین آشیش شکلا اور اشوک تیواری کو اس معاملہ میں قصوروار ٹھہرایا تھا۔ معاملہ کے چار دیگر ملزمین روپیشور عرف روپیش، چندرپال، وکاس ورما امریندر سنگھ پنٹو کو عدالت نے شواہد کی کمی کے سبب رہا کر دیا تھا۔
واضح رہے کہ متاثرہ کی شکایت پر اس وقت کی حکومت میں طاقتور وزیر پرجاپتی کے خلاف پولیس کے معاملہ درج نہیں کرنے پر 18فروری 2017 کو سپریم کورٹ کے حکم پر پولیس کو معاملہ درج کرنا پڑا۔
پرجاپتی اور دیگر چھ ملزمین کے خلاف اجتماعی عصمت دری، دھمکی دینے اور پاکسو ایکٹ کے تحت معاملہ درج ہوا تھا۔ متاثرہ نے پرجاپتی اور اس کے ساتھیوں کے خلاف اجتماعی عصمت دری کا الزام لگاتے ہوئے اس کی نابالغ بیٹی کے ساتھ بھی زبردستی جسمانی تعلقات بنانے کی شکایت درج کرائی تھی۔
