ریاست اترپردیش کے شہر رامپور میں سماجوادی پارٹی کے قومی صدر اور سابق وزیراعلیٰ اکھلیش یادو نے کارکنان سے اجلاس سے خطاب کرتے ہوئے کہا کہ اعظم خاں پر جو تکلیفیں اور دشواریاں پیش آرہی ہیں وہ تھوڑے دن کی ہی ہیں، اعظم خاں نے جس طریقہ سے پہلے ترقی کے کام کرائے ہیں وہ آگے مزید تیزی سے ان کاموں کو کرائیں گے۔
رامپور واقع ہم سفر ریزارٹ میں سماجوادی پارٹی کے کارکنان سے خطاب کرتے ہوئے اکھلیش یادو نے کہا کہ گھبرانے کی بالکل ضرورت نہیں ہے پوری پارٹی اعظم خاں کے ساتھ کھڑی ہے۔
اکھلیش یادو نے سابق وزیراعلیٰ ملائم سنگھ یادو کا ذکر کرتے ہوئے کہا کہ نیتا جی اور ہمارے اوپر بھی برے وقت گزرے ہیں، لیکن ظلم زیادہ دیر پا نہیں ہوتا، سچائی کی ایک دن جیت ضرور ہوتی ہے۔
دوسری جانب انہوں نے ریاست کی یوگی حکومت کو بھی اپنی سخت تنقیدوں کا نشانہ بنایا، انہوں نے کہا کہ اب آپ جیلوں کو بڑھائیے، ان کو بڑا کیجیے کیوں کہ ہم سب سماجوادی جیلوں میں جانا چاہتے ہیں۔
انہوں نے مزید کہا کہ ہم جب جب جیلوں میں گئے ہیں تب تب ہماری سرکاریں بنی ہیں، اس لیے اگر آپ سماجوادی سرکار چاہتے ہیں تو ڈریں نہیں جیلوں میں جانے کے لیے تیار رہیں۔
اکھیلیش یادو نے یہ بھی کہا کہ سماجوادی کی تو تاریخ رہی ہے کہ وہ عوام کی لڑائی لڑتے ہوئے اور اپنی جدوجہد کرتے ہوئے کئی مرتبہ جیل بھی گئے ہیں۔
