اتحادی پارٹیوں کا کہنا ہے آئندہ 28 فروری کو بریگیڈ میں تمام اتحادی جماعتوں کے ساتھ اجلاس کے بعد سیٹوں کے متعلق حتمی فیصلے کا اعلان ہو گا۔ انہوں نے کہا کہ' مغربی بنگال میں بایاں محاذ کانگریس اور انڈین سیکولر فرنٹ کی حکومت بنے گی۔'
میڈیا سے خطاب کرتے ہوئے ریاستی بایاں محاذ کے چئیرمین بمان بوس نے واضح کیا کہ' 2021 اسمبلی انتخابات میں بایاں محاذ کانگریس اتحاد میں پیرزادہ عباس صدیقی کی جماعت انڈین سیکولر فرنٹ بھی شامل ہو رہی ہے۔ لیکن ابھی اور دیگر سیکولر جماعتوں کے اس اتحاد میں شامل ہونے کی بات ہے۔
اسی لیے سیٹوں پر اتتفاق حتمی فیصلہ نہیں لیا گیا ہے لیکن اس کے متعلق مکمل جانکاری آئندہ 28 فروری کو بریگیڈ میں ہونے والے عظیم جلسے کے دوران دی جائے گی۔ جس میں تمام حلیف جماعتیں شامل ہوں گی۔
پریس کانفرنس کے دوران پردیش کانگریس کے صدر ادھیر چودھری نے کہا کہ' بایاں محاذ اور کانگریس اتحاد کو توڑنے کی بہت کوشش کی گئی فرقہ پرست قوتوں نے پوری کوشش کی کہ یہ اتحاد نہ ہو لیکن آئندہ اسمبلی انتخابات بایاں محاذ اور کانگریس مل کر ہی بی جے پی اور ترنمول کانگریس کے خلاف انتخابات لڑیں گے۔
اس کے علاوہ اس اتحاد میں کئی سیکولر جماعتوں نے شامل ہونے کی خواہش ظاہر کی ہے۔ لیکن انہیں اپنا موقف واضح کرنا ہوگا کہ وہ سیکولرزم کے بنا پر ہی انتخاب میں حصہ لیں گے۔ انہوں نے مزید کہا کہ ابھی آر جے ڈی اور کئی چھوٹی سیکولر جماعتوں سے بات چیت جاری ہے۔ سیٹوں کے حوالے سے مکمل معلومات بھی نہیں دیں گے، بریگیڈ اجلاس کے دوران اس پر تفصیل اطلاع دی جائے گی۔ انہوں نے مزید کہا کہ امکان ہے کہ بریگیڈ ریلی میں راہل گاندھی بھی شرکت کر سکتے ہیں۔
