مغربی بنگال میں کورونا وائرس کی دوسری لہر بھیانک صورتحال اختیار کرچکی ہے، ریاست کے تمام اضلاع میں کورونا کی دوسری لہر کا تشویشناک اثر دیکھنے کو مل رہا ہے۔
کورونا وائرس کے بڑھتے ہوئے کیسز کے مدنظر مشرقی ریلوے نے سیالدہ ہوڑہ ڈویژن میں آئندہ سات مئی سے بیشتر لوکل اور اسپیشل ٹرینوں کی معطلی میں توسیع کرنے کا اعلان کیا ہے۔
سیالدہ اور ہوڑہ ڈویژن میں لوکل اور اسپیشل ٹرینوں کی معطلی کو غیر معائنہ مدت تک بڑھانے کے سبب عام لوگوں کو پریشانیوں کا سامنا ہے۔
خبروں کے مطابق مشرقی ریلوے سیکشن میں سے سیالدہ ڈویژن میں کل 754 ملازمین کورونا سے متاثر پائے گئے ہیں۔ اس کے علاوہ ہوڑہ ڈویژن میں ساڑھے چار سو ملازمین کورونا مثبت پائے گئے ہیں۔
ریلوے انتظامیہ نے سیالدہ سیکشن میں یومیہ 55 سے 70 لوکل ٹرینوں کو معطل کرنے کا فیصلہ کیا ہے۔ سات مئی سے لوکل ٹرین خدمات کو جزوی طور پر کم کرنے کا فیصلہ کیا گیا ہے جو اگلی ہدایت تک جاری رہے گا۔
واضح رہے کہ مغربی بنگال میں کورونا وائرس کے یومیہ کیسز کی تعداد 18 ہزار سے بھی زائد ہو رہی ہے۔
ریاست میں کورونا وائرس کے مریضوں کی کل تعداد آٹھ لاکھ پہنچ چکی ہے جبکہ اس بیماری سے اب تک بارہ ہزار لوگوں کی موت ہو چکی ہے۔
دوسری طرف مغربی بنگال حکومت نے کورونا وائرس پر قابو پانے کے لیے ریاستی سطح پر جزوی لاک ڈاؤن کا اعلان کر چکی ہے۔
ریاستی حکومت کے گائیڈ لائن کے تحت صبح سات بجے سے لے صبح دس بجے دکانیں، بازار وغیرہ کھولنے کی اجازت ہے۔
