جموں و کشمیر پولیس نے جموں کے آر ایس پورہ سیکٹر میں جمعرات کو ایک تلاشی آپریشن search Operation کے دوران بھاری مقدار میں اسلحہ و گولہ بارود بر آمد کرنے کا دعویٰ کیا ہے۔ پولیس ترجمان کے مطابق جموں کے آر ایس پورہ سیکٹر میں دوران شب ڈرون کے ذریعے ڈالے جانے والے اسلحہ و گولہ بارود کے تین ڈبے برآمد کئے گئے۔
پولیس ترجمان کے مطابق بر آمد شدہ اسلحہ و گولہ بارود میں تین ڈیٹو نیٹر، تین آئی ای ڈی، تین دھماکہ خیز بوتلیں، ایک پستول، دو میگزین، چھ گرینیڈ، س70 گولیاں وغیرہ شامل ہیں۔
پولیس نے اپنے بیان میں مزید کہا کہ 'بھاری مقدار میں اسلحہ وگولہ بارود ڈالنے سے معلوم ہوتا ہے کہ ٹی آر ایف ایک بڑا ملیٹنسی منصوبہ بنا رہی تھی، جس پر جموں و کشمیر کے مستعد جوانوں نے پانی پھیر دیا ہے'۔ بیان میں کہا گیا کہ اس ضمن میں پولیس اسٹیشن ارینہ میں ایک کیس درج کرکے تحقیقات شروع کی گئی ہیں۔
قبل ازیں جمعرات کی علی الصبح آر ایس پورہ میں بین الاقوامی سرحد پر بی ایس ایف اہلکاروں نے ایک ڈرون کو دیکھتے ہی اس کی طرف گولیاں چلائیں جس کے بعد وہ واپس چلا گیا۔
