کانگریس کے ترجمان اعلیٰ رویندر شرما کے مطابق ’’وزیر اعظم نریندر مودی کی جانب سے سابق وزیر اعظم راجیو گاندھی کے متعلق نازیبا کلمات اور بعد ازاں گورنر ستیہ پال ملک کی طرف سے مودی کی حمایت‘‘ کرنے پر انہوں نے احتجاج کیا۔
احتجاج میں شامل کانگریس کارکنان نے نریندر مودی اور بھاجپا مخالف نعرے بازے کرتے ہوئے بھاجپا کا پتلہ نذر آتش کیا۔
رویندر شرما نے الزام عائد کیا کہ ’’گورنر اپنے منصب کا غلط استعمال کرتے ہوئے دہلی میں بیٹھے اپنے آقا کو خوش کررہے ہیں۔‘‘
گورنر ستیہ پال ملک کی جانب سے نریندر مودی کے بیان کی حمایت پر اپنا رد عمل ظاہر کرتے ہوئے ہوئے رویندر کا کہنا تھا کہ ’’گورنر کو ایسی باتیں زیب نہیں دیتی، اگر انہیں بھاجپا سیاست ہی کرنی ہے تو پہلے گورنر کے منصب سے مستعفی ہو جائیں۔‘‘
انکا مزید کہنا تھا کہ ’’گورنر ایک اعلیٰ منصب ہے اور انہیں چاہیے کہ وہ اس قسم کے مذموم اور سیاسی پروپگنڈے سے دور رہیں۔‘‘
سابق وزیر اعظم راجیو گاندھی کے متعلق رویندر شرما نے کہا کہ ’’وہ ہمارے درمیان نہیں ہیں، انہوں نے ملک کے لیے اپنی جان نچھاورکی تاہم گورنر موصوف شہید کے خلاف نازیبا الفاظ استعمال کرتے ہیں جو انتہائی شرمناک اور قابل مذمت ہے۔‘‘
وزیر اعظم نریندر مودی پر نشانہ سادھتے ہوئے رویندر کا کہنا تھا کہ ’’نریندر مودی شکست خوردگی کا شکار ہوئے ہیں اور اب اپنی پارٹی کی ناکامیوں کو چھپانے کی خاطر دوسروں پر الزام تراشیوں میں لگے ہوئے ہیں۔ مودی حکومت تمام محاذوں پر مکمل طور پر ناکام ہوگئی ہے۔‘‘
