جے پور: جلوس محمدیﷺ نکالنے پر تذبذب

جشن ولادت النبیﷺ دنیا بھر میں بڑے ہی تزک و احتشام کے ساتھ منایا جاتا ہے اور جےپور میں بھی ہر برس اس کا اہتمام بڑے ہی دھوم دھام سے کیا جاتا رہا ہے۔

ریاست راجستھان کے دارالحکومت جے پور میں عاشقان رسول کی جانب سے 12 ربیع الاول کے روز جشن ولادت النبیﷺ کے طور پر ہر برس 'جلوس محمدی' نکالا جاتا تھا۔لیکن موجودہ وقت میں کورونا وباء کے مدنظر جے پور کی تاریخ میں دوسری مرتبہ ایسا ہوگا جب جلوس محمدی نہیں نکالا جائے گا۔

گذشتہ برس 2019 میں جے پور میں متنازعہ اراضی بابری مسجد فیصلہ آنے کی وجہ سے یہ جلوس نہیں نکالا گیا تھا اور موجودہ وقت میں کورونا وباء کے سبب مسلم برادری کی جانب سے یہ بڑا فیصلہ لیا جا سکتا ہے۔

جلوس محمدی انچارج حاجی رفعت کا کہنا ہے کہ حکومت کے ذمہ داروں اور محکموں کے افسران سے مسلسل ہماری میٹنگ ہورہی ہے، جو بھی فیصلہ ان میٹنگ میں لیا جائے گا وہی آخری فیصلہ ہوگا۔اگر جلوس کی اجازت نہیں ملتی ہے تو جے پور کی تاریخ میں دوسری مرتبہ ایسا ہوگا۔

حاجی رفعت کا کہنا ہے کہ ہم عوام سے اپیل کریں گے کہ وہ حکومتی ایڈوائزری کا مکمل خیال رکھیں اور کہیں بھی ایک ساتھ مل کر نہ کھڑیں ہوں۔

واضح رہے کہ کورونا وباء کے پیش نظر گائیڈ لائن کے مطابق کوئی بھی بڑے تہوار جس میں لوگ ایک جگہ کافی تعداد میں جمع ہوتے ہیں اس کی اجازت نہیں دی گئی ہے۔