گزشتہ دنوں مرکزی حج کمیٹی کی جانب سے آن لائن ایپلیکیشن کی تاریخ 5 دسمبر کی گئی تھی جس کے بعد ایک بار پھر آج مرکزی حج کمیٹی کی جانب سے یہ شیڈیول جاری کیا گیا ہے، جس میں بتایا گیا ہے کہ آن لائن اپلیکیشن کی تاریخ بڑھا دی گئی ہے۔
واضح رہے کہ ریاست راجستھان سے آج یعنی 5 دسمبر تک 7500 کے قریب آن لائن فارم راجستھان سے بھرے جا چکے ہیں۔ مرکزی حج کمیٹی کی ممبر فیروزہ نے ای ٹی وی بھارت کے نمائندے سے فون پر بات چیت کے درمیان بتایا کہ پاسپورٹ میں کسی طرح کی غلطی ہونے کی وجہ سے ایک بار پھر تاریخ میں اضافہ کیا گیا ہے۔ حالانکہ حج کی تاریخ میں اضافے کے بعد حج ویلفیئر سوسائٹی مرکزی حج کمیٹی کے اس فیصلے کی مخالفت کرتی ہوئی نظر آ رہی ہے۔
راجستھان حج ویلفیئر سوسائٹی کے جنرل سکریٹری حاجی نظام الدین کا کہنا ہے کہ مرکزی حج کمیٹی اور مرکزی حکومت مسلم عوام کے اس رقم سے اپنا خزانہ بھرنے میں لگی ہوئی ہے۔
نظام الدین کا کہنا ہے کہ جو حکومت کی جانب سے چار سال کی پولیسی کو ختم کیا گیا تھا اس پالیسی کو ختم کرنے کی مخالفت ہم نے سنہ 2017 میں بھی کی تھی اور اب بھی کر رہے ہیں اور اس بات کی مخالفت آگے بھی مسلسل جاری رہے گی۔ ان کا کہنا ہے کہ حج کی اولین ایپلیکیشن کی تاریخ میں اضافہ کرنے سے جو پرائویٹ تنظیمیں ہیں انہیں زیادہ مشکلات کا سامنا کرنا پڑتا ہے۔
