راجستھان کے بھرت پور کے پیلو پورہ میں دہلی۔ممبئی ریل روٹ پر گزشتہ 12 دنوں سے ڈیرا ڈالے گجر مظاہرین نے آج صبح ریلوے ٹریک سے قبضہ ہٹانے کے ساتھ ہی ان تمام ٹریک سے رکاوٹیں ہٹادیں جہاں وہ گذشتہ کئی دنوں سے دھرنا و مظاہرہ کررہے تھے۔
گجر ریزرویشن کے حوالہ سے ریاستی حکومت کے ساتھ گجر رہنما کروڑی سنگھ بینسلا کی گذشتہ شب سرکار سے سمجھوتے کے بعد صبح میں بینسلا کے بیٹے وجے بینسلا پیلو پورہ ریلوے ٹریک پر پہنچے جہاں انہوں نے ریزرویشن حامی گجر مظاہرین کو سرکار سے ہونے والے سمجھوتے کی جانکاری دی اور ساتھ ہی دھرنا و مظاہرہ ختم کرنے اور ریل ٹریک سے ہٹنے کا اعلان کیا۔
وجے بینسلا نے پیلو پورہ سے ہی ان سبھی گجر مظاہرین کو بھی موبائل فون سے اس بات کا بھی پیغام دیا کہ وہ اپنے اپنے علاقوں میں بلاک کی گئی سڑکوں سے رکاوٹیں ہٹادے تاکہ لوگوں کو آنے جانے میں کوئی پریشانی نہ ہو۔
پیلوپورہ میں ریلوے ٹریک کو خالی کرنے کے فوراً بعد ریلوے کے تکنیکی عملے نے پیلوپورہ ریلوے ٹریک پر پٹریوں کی مرمت کا کام شروع کردیا ہے۔
واضح ہو کہ کوجر کے دھرنا مظاہرہ کے باعث مختلف ٹرینوں کو کینسل کر دیا گیا اور بہت ساری ٹرینوں کے روٹ کو بدل دیا گیا تھا کیونکہ گوجروں نے ریلوے ٹریک پر قبضہ جما لیا تھا۔
