ریاست بہار کے وزیراعلی نتیش کمار 24 اگست کو گاندھی میدان سے ضلع میں تقریبا چار ارب روپئے کے منصوبوں کی سنگ بنیاد اور افتتاح کرنے کے مقصد سے آئیں گے۔
وزیراعلی کی آمد اورمنصوبوں کے افتتاح و سنگ بنیاد کی وجہ سے ضلع انتظامیہ تیاریوں میں مصروف ہے۔
جلسہ عام کے لیے گاندھی میدان میں پچاس ہزار فٹ ایریا پر واٹر پروف پنڈال بنایا جارہا ہے جس میں قریب دس ہزار افراد کے بیٹھنے کے انتظامات کئے جارہے ہیں، اسکے علاوہ اسٹیڈیم میں ہیلی پیڈ اور اسٹیڈیم سے جلسہ گاہ تک پہنچنے کے لیے پکے کے راستے بنائے جارہے ہیں۔
واضح رہے کہ وزیراعلی کی آمد کی وجہ سے ایک روز قبل مگدھ کمشنر پنکج کمار پال ، ڈسٹرک مجسٹریٹ ابھشیک کمار سنگھ ، ایس ایس پی راجیومشرا کے علاوہ اعلی حکام نے گاندھی میدان کی تیاریوں کاجائزہ لیا۔
پروگرام کو دیکھتے ہوئے کئی زون میں گاندھی میدان کوتقسیم کیا گیا ہے۔ ٹریفک نظام میں بھی تبدیلی کی گئی ہے ، گاندھی میدان اور کلکٹریٹ کی جانب جانے والے راستوں کو بند کرنے کی بھی ہدایت دی گئی ہے ۔
وزیراعلی بہارکی آمد کے پیش نظر شہر گیا اور اطراف میں سخت حفاظتی بندوبست کیے گئے ہیں اور انتظامیہ کی جانب سے سیاہ کپڑے یا سیاہ رنگ کے سامانوں کے ساتھ گاندھی میدان میں آنے پر پابندی لگائی گئی ہے، ضلع پولیس کے علاوہ گاندھی میدان میں سی آرپی ایف کے جوانوں کی بھی تعیناتی کی گئی ہے اور وزیراعلی کے حفاظتی دستے بھی پٹنہ سے گیا پہنچ چکے ہیں۔
واضح رہے کہ وزیراعلی نتیش کمار کا یہ سرکاری دورہ ہے اپنے دورہ کے دوران گاندھی میدان میں جلسہ عام سے خطاب بھی کرینگے اور ریموٹ سے منصوبوں کا افتتاح کرینگے، اسکے بعد وزیراعلی کمشنری دفتر میں کمشنری کے پانچوں ضلعوں کے اعلی افسران کے ساتھ میٹنگ کرکے سرکاری منصوبوں کاجائزہ لیں گے۔
ذرائع سے ملی اطلاع کے مطابق وزیراعلی قریب 22781 کروڑ روپئے کے منصوبے کا سنگ بنیاد رکھیں گے جبکہ 16037 کروڑ روپئے کے منصوبوں کاافتتاح کرینگے۔
