عام آدمی پارٹی کے دفتر میں پریس کانفرنس سے خطاب کرتے ہوئے سنجے سنگھ نے کہا کہ مرکزی حکومت کی غلط پالیسیوں کی وجہ سے یس بینک کے 21 لاکھ اکاؤنٹ ہولڈرز کے سامنے ایک بڑا بحران پیدا ہوا ہے۔
پریس کانفرنس کے دوران سنجے سنگھ نے کہا کہ یہ گھوٹالہ بی جے پی نے منصوبہ بند انداز میں کرایا ہے۔ انہوں نے کہا کہ نرملا سیتارمن نے کہا تھا کہ 2017 سے ہم نے یس بینک میں جاری سرگرمیوں کی نگرانی کے لئے آر بی آئی کو تعینات کیا ہے۔
لیکن حیرت کی بات یہ ہے کہ 2017 سے 2020 کے درمیان، کس بنیاد پر بڑے سرمایہ داروں کو ایک لاکھ کروڑ روپے کا اضافی قرض دیا گیا۔ ان کمپنیوں کی خراب حالت کے بارے میں کئی بار اطلاعات موصول ہوتی رہی ہیں ، لیکن اس کے باوجود ان کمپنیوں کو بینک نے قرض دیا ہے۔
پریس کانفرنس کے دوران سنجے سنگھ نے کہا کہ بی جے پی جس نے ملک کو بچانے کا نعرہ لگایا ہے، اس کا نعرہ آج بدل گیا ہے۔ آج بی جے پی کا نعرہ ہے کہ 'نہ ہندو بچے گا اور نہ مسلمان بچے گا ، اس دیش کا ہر انسان لٹے گا'۔
مرکز میں بیٹھی بی جے پی حکومت کا کہنا ہے کہ یہ ایک نجی ادارہ ہے۔ ایک طرف ، بی جے پی حکومت ریلوے،ملک کے ہوائی اڈوں کو بیچنے اور ان کو نجی بنانے کی بات کرتی ہے، اور جب یہ برباد ہوجاتی ہے تو وہ کہتی ہے کہ یہ نجی ہے۔ کوئی بھی بینک ریزرو بینک کی اجازت کے بغیر کام نہیں کرسکتا، لہذا بھارتیہ جنتا پارٹی اپنی ذمہ داری سے کیسے بھاگ سکتی ہے۔
