دہلی کے وزیراعلی کا مسلسل تیسری مرتبہ عہدہ سنبھالنے کے بعد کیجریوال کی بدھ کے روز امت شاہ سے یہ پہلی ملاقات تھی۔
کیجریوال نے بعد میں ریاستی کابینہ کے اجلاس کے بعد پریس کانفرنس میں کہا امت شاہ کے ساتھ ملاقات اچھی رہی۔ انہوں نے کہا خوشگوار ماحول میں میٹنگ ہوئی جس میں 'ہم نے مختلف مسائل پر تبادلہ خیال کیا۔ دونوں نے اس بات پر رضا مندی ظاہر کی کہ دہلی کی تعمیر وترقی کے لیے مرکز اور ریاستی حکومت کو مل کر کام کرنے کی ضرورت ہے اور ہم ساتھ مل کر کام کریں گے'۔
وزیر اعلی نے شاہین باغ کے دھرنے کے تعلق سے پوچھے گئے سوال پر کہا کہ شاہ کے ساتھ اس مسئلے پر کوئی بات چیت نہیں ہوئی۔
انہوں نے کہا 'دہلی حکومت کے وزراء محکمہ کے سربراہان اور سیکریٹریوں کے ساتھ آج میٹنگ ہوئی جس میں گارنٹی کارڈ کو کس طرح سے عمل میں لایا جا سکتا ہے، اس پر تفصیلی تبادلہ خیال کیا گیا۔
متعلقہ محکموں کو ایک ہفتے کے اندر گارنٹی کارڈ کو کس طرح لاگو کیا جانا ہے، اس پر منصوبہ بندی کرنے کے لیے ہدایات جاری کی گئی ہیں۔
