مکل ندھی میم (ایم این ایم) کے صدر کمل ہاسن مدراس یونیورسٹی میں مظاہرین طلبا سے ملاقات کرنے پہنچے لیکن انہیں کیمپس کے اندر جانے کی اجازت نہیں دی گئی ۔ کمل ہاسن نے کہا کہ میرا فرض ہے کہ میں طلبا سے ملاقات کروں۔
کمل ہاسن نے بدھ کے روز مدراس یونیورسٹی کے احاطے کا دورہ کیا اور شہریت ترمیمی قانون کے خلاف احتجاج کررہے طلبا کے ساتھ یکجہتی کا اظہار کیا۔
تاہم ، کمل ہاسن کو مرکزی کیمپس میں داخل ہونے کی اجازت نہیں دی گئی اور انہوں نے یونیورسٹی کے مرکزی دروازے پر ہی طلبا سے بات کی۔
انہوں نے کہا ، "مجھے اندر جانے کی اجازت نہیں ہے ، وہ کہتے ہیں کہ آپ کو طلباسے کوئی لینا دینا نہیں ہے۔"
انہوں نے کہا کہ میں مرتے دم تک خود کو طالب علم ہی کہوں گا اور اسی وجہ سے میں یہاں ان سے ملنے آیا ہوں۔"
انہوں نے کہا کہ وہ جہاں بھی رہیں گے طلبا کے لیے آواز اٹھاتے رہیں گے۔
