ویسے تو ہمارے معاشرے میں پولس کا کردار بالی ووڈ کی فلموں کے ویلن کی طرح ہوتا ہے لیکن ریاست بہار کے بھاگلپور شہر کی پولس کا چہرہ لاک ڈاؤن کی اس گھڑی میں بدلا ہوا نظر آ رہا ہے۔ جی ہاں مصیبت کی اس گھڑی میں جہاں روز مرہ کمانے کھانے والے لوگ دانے دانے کو محتاج ہیں پولس نے ان لوگوں کی طرف مدد کا ہاتھ بڑھایا ہے۔ اسی کڑی میں تاتارپور تھانہ اور مقامی اہلکاروں کی مدد سے ضرورتمندوں میں کھانے پینے کی اشیاء تقسیم کی گئی۔
ضرورتمند لوگوں کا کہنا ہے کہ وہ لوگ دانے دانے کو محتاج ہیں لیکن حکومت کی طرف سے ان لوگوں کی کوئی مدد نہیں کی جا رہی ہے۔ خاص طور پر لاک ڈاؤن میں وہ لوگ بہت پریشان ہیں جن کے پاس باضابطہ اپنا کوئی ٹھکانہ نہیں ہے۔ جھگی جھونپڑیوں میں کسی طرح زندگی گزارتے ہیں۔ ایسے ہی ضرورت مند لوگوں میں تاتارپور پولس اور تاتارپور کی نوجوان کمیٹی کی طرف سے روزانہ یوں ہی کھانے پینے کی اشیاء تقسیم کی جا رہی ہے۔
لاک ڈاؤن کی وجہ سے ایک بڑا مزدور طبقہ کھانے پینے کو محتاج ہو گیا ہے اس لحاظ سے بھاگلپور پولس اور مقامی اہل خیر حضرات کی طرف سے کی جا رہی یہ ایک چھوٹی سی لیکن قابل ستائش پہل ہے۔ اہل خیر حضرات نے مصیبت کی اس گھڑی میں سبھی اہل حضرات اور باحیثت لوگوں سے اس طرح کے نیک کاموں میں بڑھ چڑھ کر حصہ لینے کی اپیل بھی کی ہے۔
