مالیگاؤں میں سڑک حادثہ، دو ہلاک

مالیگاؤں قومی شاہراہ نمبر 3 پر آج شام ایک اندوہناک سڑک حادثہ پیش آیا.ٹرک اور موٹر سائیکل میں تصادم ہونے کی وجہ سے موٹر سائیکل سوار دو لڑکوں کی موت ہوگئی جن کی شناخت مصدق احمد محمد یسین اور انصاری عبیدالرحمن نثار احمد کے طور پر ہوئی ہے۔

ریاست مہاراشٹر کے شہر مالیگاؤں میں قومی شاہراہ نمبر 3 پر جنتا نمبر ون سائزنگ کے قریب میں یہ دونوں نوجوان عیدمیلادالنبی چھٹی کے موقع پر سیر و تفریح کی غرض سے موٹر سائیکل جسکا نمبر MH.41.BC.4185 پر جارہے تھے کہ پیچھے کی سمت سے تیز رفتار ٹرک نے ان کی موٹر سائیکل کو ٹکر مار دی جس کے سبب موقع پر ہی موٹر سائیکل سوار مصدق احمد محمد یسین اور انصاری عبیدالرحمن نثار کی موت ہوگئی، اس حادثہ کے بعد قومی شاہراہ نمبر 3 پر چند گھنٹوں تک آمدرفت متاثر رہی.

سماجی کارکن شفیق،کارپوریٹر منصور اور پوارواڑی پولس عملہ نے جائے واقعہ پر پہنچ کر تفتیش شروع کردی، تحقیق کے مطابق ٹرک ڈرائیور موٹر سائیکل کو پیچھے سے ٹکر مار کر فرار ہوگیا.

اس حادثہ کے بعد مقامی باشندوں نے قومی شاہراہ کی ٹریفک جام کردی.جس سے گاڑیوں کی آمدرفت متاثر ہوگئی.پوارواڑی پولس عملہ نے مشتعل ہجوم کو منتشر کرکے ٹریفک نظام کو بحال کیا۔ تمام قانونی مراحل کی تکمیل کے بعد نعش کو اہل خانہ کے حوالے کردیا گیا۔