ریاست مہاراشٹر کے شہر اورنگ آباد میں کُل ہند مجلس اتحادالمسلمین کے صدر اسد الدین اویسی نے ریاستی حکومت سے مطالبہ کیا کہ مہاراشٹرا کے مسلمانوں کو ان کی پسماندگی کی بنیاد پر ریزرویشن (Asaduddin Owaisi Demands Reservation) ملنا چاہیئے۔ ایم آئی ایم سربراہ نے کہا کہ مسلمانوں کو ان کا حق دلانے کے لیے ریاستی سطح پر مہم بھی چلائی جائے گی۔
انہوں نے مزید کہا کہ مہاراشٹر کا مسلمان ہر لحاظ سے پچھڑا ہوا ہے، انصاف کا تقاضہ یہ ہے کہ مسلمانوں کو ان کی پسماندگی کی بنیاد پر ریزرویشن دیا جائے۔
اورنگ آباد کے ہوٹل راما انٹر نیشنل میں میڈیا نمائندوں سے بات کر تے ہوئے اسد الدین اویسی نے کہا کہ جب اس معاملہ پر عدالت کا فیصلہ آگیا ہے تو پھر حکومت کیوں ٹال مٹول کررہی ہے، ایک بل لا کر اس مسئلے کو حل کیا جاسکتا ہے۔
مزید پڑھیں:ایم آئی ایم صدر اویسی دو روزہ دورے پر اورنگ آباد پہنچے
انہوں نے اعداد وشمار کی بنیاد پر کہا کہ ریاست میں مسلمانوں کی حالت قابل رحم ہے۔ اور وقت کا تقاضہ ہے کہ انھیں ان کا حق ملنا چاہیے۔
