ریاست مہاراشٹر میں بھی بیرون ریاستوں سے روزگار کے لیے آئے لاکھوں مزدور قومی شاہراہ پر دیکھے گئے جو سینکڑوں میل کا سفر طئے کرکے اپنے گھروں کو پیدل جانے پر مجبور ہیں۔
لیکن اورنگ آباد کے مضافات میں اتر پردیش اور بہار سے تعلق رکھنے والے ایک درجن سے زیادہ مزدوروں کے ساتھ معاملہ کچھ مختلف ہے۔
اورنگ آباد سے پندرہ کلومیٹر فاصلے پر واقع چوکا گاؤں میں پھنسے سترہ سے زائد یوپی بہار کے مزدوروں کے حالات انتہائی خراب ہیں۔
ان مزدوروں کو پانچ مہینے سے مزدوری نہیں ملی ہے، تین مہینے سے کام بند پڑا ہے اور مزدوری دینے کا وعدہ کرکے ٹھیکیدار غائب ہوگیا ہے۔
اسی دوران کورونا وائرس کے سبب لاک ڈاؤن کا اعلان ان مزدروں کے لیے کسی عتاب سے کم نہیں تھا، تاہم چوکا گاؤں کے سرپنچ اور گاؤں والوں نے ان مزدوروں کے نہ صرف کھانے پینے کا انتظام کیا بلکہ انھیں تمام ضروری اشیا بھی فراہم کرادیں۔
گاؤں والوں نے انھیں تاکید کی ہے کہ حالات بہتر ہونے تک وہ گاؤں نہ چھوڑیں اور تب تک گاؤں کے سرپنچ اور گاؤں والوں کی جانب سے ان کی پوری مدد کی جائے گی۔
