جموں وکشمیر کے ضلع اننت ناگ کے کوکرناگ علاقے میں واقع بٹہ پورہ لارنو میں اتوار کی شام آگ لگنے سے کم از کم تین دکانیں جل کر خاکستر (Three Shops Gutted In Fire Incident) ہوگئیں۔
آتشزدگی کی خبر پھیلتے ہی مقامی لوگوں نے آگ بجھانے کے لیے ہنگامی بنیادوں پر اپنی کوششیں شروع کی، تاہم جب تک آگ پر قابو پایا جا سکا تب تک تین دکانیں راکھ کے ڈھیر میں تبدیل ہوگئیں، جن میں منظور احمد، جاوید احمد اور محمد حسین کی تین دکانوں میں رکھا مال جل کر خاک ہو گیا۔ آگ کیسے لگی ابھی اس کا پتہ نہیں چل سکا ہے۔
ذرائع سے موصول ہوا ہے کہ آگ پر قابو پانے کی کوششوں کے دوران دو مقامی نوجوانوں کے ہاتھوں میں شیشہ لگنے کی وجہ سے چوٹ آئی جنہیں نزدیکی ہسپتال میں منتقل کیا گیا ہے۔
مقامی باشندوں نے اس دوران فائر اینڈ ایمرجنسی سروسز (Fire and Emergency Services) پر دیر سے پہنچنے کا الزام لگایا۔ ذرائع کے مطابق مقامی لوگوں نے وقت پر متعلقہ محکمہ کو اطلاع دی تھی، تاہم فائر عملہ دیر سے پہنچی۔
واضح رہے کہ لارنو کے لیے دو سال قبل فائر اینڈ ایمرجنسی یونٹ کی منظوری دی گئی تھی، لیکن اس کا قیام ابھی تک نہیں ہوا۔
