ماہ رجب کی چاند سے چھ رجب تک حضرت خواجہ معین الدین چشتیؒ کے عرس کا اہتمام کیا جاتا ہے۔ عرس کا باقاعدہ آغاز یکم رجب سے ہوتا ہے۔ اس موقع پر جنتی دروازہ کھولا جائے گا، پانچ رجب کو محفل سماع اور چھ رجب کو بڑی قل شریف ہوگی۔
خیال رہے کہ خواجہ معین الدین حسن چشتیؒ کا یہ 808 واں سالانہ عرس ہے۔ عرس کا آغاز عموما چاند کی 25 ویں تاریخ کو جھنڈے کی رسم کے ساتھ رسمی طور پر کیا جاتا ہے۔
خبروں کے مطابق خواجہ کے دربار میں سب سے پہلی چادر اندریش کمار نے بھیجی ہے اور مرکزی اقلیتی وزیر مختار عباس نقوی کل وزیر اعظم کی چادر لے کر پہنچیں گے۔
ای ٹی وی بھارت نے اس سلسلے میں درگاہ کمیٹی کے رکن منور خان سے خصوصی بات چیت کی اور انتظامی امور کے تعلق معلومات جاننے کی کوشش کی۔
انہوں نے کہا کہ 'درگاہ کمیٹی نے ضلع انتظامیہ کی مدد سے عقیدت مندوں کے لیے خصو صی انتظامات کیے ہیں۔ حفاظتی انتظامات کے پیش نظر ہر چوک چوراہے پر سی سی ٹی وی کمیرے لگائے گئے ہیں'۔
انہوں نے کہا کہ 'درگاہ کمیٹی اور ضلع انتظامیہ حفاظتی انتظامات کے تعلق سے پوری طرح مستعد ہے اور پوری ذمہ داری کے ساتھ اپنے فرائض انجام دے رہے ہیں'۔
