مغربی بنگال میں ملک کی مختلف مزدور تنظیموں کی جانب سے بلائی گئی 24 گھنٹے کی ہڑتال کو بائیں محاذ اور کانگریس نے کامیاب قرار دیا تو ترنمول کانگریس کی حانب سے اس کی تنقید کی گئی ترنمول کانگریس کے رہنما راجیب بنرجی نے محاذ اور کانگریس پر تنقید کرتے ہوئے کہا کہ بھارت بند سے عوام کو دشواریوں کا سامنا کرنا پڑا ہے۔
راجیب بنرجی کا کہنا تھا کہ اس کی ذمہ داری کون لے گا، ہو سکتا ہے کہ بھارت بند کامیاب ہوا ہو لیکن اس بات کو کسی بھی قیمت پر نظر انداز نہیں کیا جا سکتا ہے کہ دن بھر لوگ پریشان رہے۔
راجیب بنرجی کے مطابق ترنمول کانگریس بند کی سیاست میں یقین نہیں رکھتی ہے، اسی وجہ سے بند کی حمایت نہیں کی، انہوں نے کہا کہ مستقبل میں بھی بند کی سیاست کا سہارا نہیں لیا جائے گا
ترنمول کانگریس کے رہنما کا کہنا ہے کہ ہماری پارٹی بی جے پی کی قیادت والی مرکزی حکومت کی ناقص پالیسیوں کی مخالفت کرتی ہے، ترنمول کانگریس بینکوں، ریلوے، لوکو موٹو(ریلوے اینجنئیرنگ ورکشاپ)، منافع بخش سرکاری اداروں کے نجی کاری کے خلاف ہے۔
ترنمول کانگریس مسلسل کسان بل کی مخالفت کرتی رہی ہے کیونکہ ہمیں پتہ ہے کہ اس بل سے کسانوں کو نقصان ہوگا اس کے ساتھ ساتھ عام لوگوں کو بھاری قیمت چکانی پڑ سکتی ہے۔
واضح رہے کہ ملک کی مختلف مزدور تنظیموں نے بینکوں، ریلوے، لوکو موٹو(ریلوے اینجنئیرنگ ورکشاپ)، منافع بخش سرکاری اداروں کے نجی کاری، بے روزگاری اور کسان بل کے خلاف بھارت بند کا اعلان کیا تھا، کانگریس، بائیں محاذ اور اس کی حلیف جماعتوں نے بھارت بند کی حمایت کی تھی، بنگال میں بند کا گہرا اثر رہا۔
