الہ آباد ہائی کورٹ کی لکھنؤ بنچ نے تاج محل کے 22 کمروں کو کھولنے کی درخواست کو خارج کر دیا ہے۔ سماعت کے دوران ہائی کورٹ نے فیکٹ فائنڈنگ کمیٹی بنانے کے مطالبے پر سوال اٹھایا اور درخواست گزار سے کہا کہ کمیٹی بنا کر آپ کیا جاننا چاہتے ہیں؟ عدالت نے کہا کہ درخواست مناسب نہیں ہے اور عدالتی مسائل پر مبنی نہیں ہے۔ Allahabad HC rejects PIL to open Taj Mahal rooms
جسٹس ڈی کے اپادھیائے اور جسٹس سبھاش ودیارتھی کی ڈویژن بنچ نے تاج محل معاملے کی سماعت کرتے ہوئے درخواست گزار سے پوچھا کہ آپ کون سا ججمنٹ دکھا رہے ہیں؟ درخواست گزار نے ہائی کورٹ اور سپریم کورٹ کے کئی ججمنٹ پیش کیے، جن میں آرٹیکل 19 کے تحت بنیادی حقوق اور خاص طور پر عبادت اور مذہبی عقیدے کی آزادی کا ذکر کیا گیا ہے۔
اس پر الہ آباد ہائی کورٹ کی لکھنؤ بنچ نے کہا کہ ہم آپ کے دلائل سے متفق نہیں ہیں۔ سماعت کے دوران ہائی کورٹ نے کہا کہ یہ پی آئی ایل درست نہیں ہے، کمروں کو کھولنے سے متعلق درخواست کے لیے تاریخی تحقیق میں مناسب طریقہ شامل کیا جائے، اسے مورخین پر چھوڑ دیا جائے، ہم ایسی درخواست نہیں سن سکتے۔
جسٹس ڈی کے اپادھیائے نے درخواست گزار سے کہا کہ کیا آپ سمجھتے ہیں کہ تاج محل شاہ جہاں نے نہیں بنایا؟ کیا ہم یہاں کوئی فیصلہ سنانے آئے ہیں؟ جیسے کہ اسے کس نے بنوایا یا تاج محل کی عمر کیا ہے؟
ہائی کورٹ نے سخت تبصرہ کرتے ہوئے کہا کہ جس موضوع کے بارے میں آپ کو علم نہ ہو، اس پر تحقیق کریں، جائیے ایم اے کیجیے، پی ایچ ڈی کیجیے، اگر کوئی ادارہ آپ کو تحقیق نہیں کرنے دیتا تو ہمارے پاس آئیں۔ ہائی کورٹ نے کہا کہ آپ نے تاج محل کے 22 کمروں کی معلومات کس سے مانگی؟
ہائی کورٹ کے سوال کے جواب میں درخواست گزار کے وکیل نے کہا کہ ہم نے اتھارٹی سے معلومات مانگی ہے۔ اس پر ہائی کورٹ نے کہا کہ اگر انہوں نے کہا کہ سکیورٹی وجوہات کی وجہ سے کمرے بند ہیں تو یہ جانکاری ہے۔ اگر آپ مطمئن نہیں ہیں تو چیلنج کریں۔ براہ کرم ایم اے میں داخلہ لیں پھر NET، JRF کے لیے جائیں اور اگر کوئی یونیورسٹی آپ کو ایسے موضوع پر تحقیق کرنے سے منع کرتی ہے تو ہمارے پاس آئیں۔ درخواست گزار نے کہا کہ مجھے ان کمروں میں جانے کی اجازت دیں۔ اس پر ہائی کورٹ نے سخت تبصرہ کرتے ہوئے کہا کہ کل آپ آئیں گے اور ہمیں معزز ججوں کے چیمبر میں جانے کی اجازت مانگیں گے؟ براہ کرم پی آئی ایل سسٹم کا مذاق نہ بنائیں۔
یہ بھی پڑھیں: BJP MP Diya Kumari on Taj Mahal: تاج محل پر بی جے پی رہنما دیا کماری کا متنازع دعویٰ
