شمالی کشمیر کے ضلع بانڈی پورہ میں یوم اساتذہ کے تعلق سے گورنمنٹ ہائی اسکول باگ بانڈی پورہ میں ایک تقریب منعقد کی گئی جس میں اساتذہ، طلباء اور دیگر کئی سرکردہ افسران نے شرکت کی۔
اس تقریب کا مقصد معاشرے کی ترقی میں ایک استاد کے کردار اور اس کی اہمیت کو بتانا تھا اور اس استاد کی اہمیت کے حوالے سے طلباء کے درمیان ایک حس پیدا کرنا تھا تاکہ ایک استاد جس قدر و منزلت کا حق رکھتا ہے اس سے لوگوں کو آگاہ کیا جائے۔
تقریب میں ڈپٹی کمشنر بانڈی پورہ ڈاکٹر اویس احمد نے مہمان خصوصی کے طور پر شرکت کی جب کہ تقریب میں چیف ایجوکیشن آفیسر، مختلف اسکولوں کے پرنسپلز، ہیڈ ماسٹرز اور دیگر ایوارڈ یافتہ اساتذہ بھی موجود تھے۔
مزید پڑھیں:۔ کشمیری ٹیچرقومی ایوارڈ حاصل کریں گی
اس موقع پر محکمہ تعلیم سے وابستہ اساتذہ کی ضلع بانڈی پورہ کے مختلف تعلیمی زونس میں ان کی غیر معمولی شراکت کے لیے خاص طور پر آن لائن کلاسز، کمیونٹی کلاسز کے ذریعے طلباء کو پڑھانے اور انہیں کووڈ 19 وبا کے دوران آف لائن اسٹڈی مواد کی فراہمی میں جو کردار انہوں نے ادا کیا اس کی حوصلہ افزائی کی گئی اور اساتذہ کو اس حوالے سے اعزاز سے نوازا گیا۔
اس موقع پر خطاب کرتے ہوئے ڈی سی بانڈی پورہ ڈاکٹر اویس احمد نے کہا کہ اساتذہ قوم کے معمار ہیں اور یہ دن معاشرے کو ان کا شکریہ ادا کرنے اور ان کی شراکت کو تسلیم کرنے کا موقع فراہم کرتا ہے۔
