ترواننت پورم: قومی تحقیقاتی ایجنسی (این آئی اے) نے جمعرات کو کیرالہ میں 56 مقامات پر چھاپے مار کر پاپولر فرنٹ آف انڈیا (پی ایف آئی) کے مبینہ مارشل آرٹ اور ہٹ اسکواڈ ٹرینر کو گرفتار کیا ہے۔ این آئی اے نے 19 ستمبر 2022 کو خود نوٹس لے کر درج معاملے میں پی ایف آئی کے ٹرینر اور کیرالہ ہائی کورٹ کے وکیل محمد مبارک اے کو گرفتار کیا۔ یہ گرفتاری گزشتہ ستمبر میں پی ایف آئی لیڈروں کی گرفتاری اور 29 دسمبر کو کیرالہ میں 56 مقامات پر ایک اور تلاشی کے بعد ہوئی ہے۔NIA Arrests PFI Squad Trainer in kerala
جمعرات کو تلاشی کے دوران اس کے گھر سے بیڈمنٹن ریکیٹ بیگ میں چھپائے گئے ہتھیاروں میں کلہاڑی، تلوار اور دراتی بھی شامل تھی۔ رپورٹس میں دعویٰ کیا جا رہا ہے کہ پی ایف آئی مختلف ریاستوں اور اضلاع میں لیڈروں اور دیگر کمیونٹیز کے اراکین کو نشانہ بنانے کے لیے ہٹ اسکواڈ بنانے اور تربیت دینے کے لیے کام کر رہی تھی۔ اس معاملے میں مزید تفتیش جاری ہے۔
یہ بھی پڑھیں: Home Ministry Banned PFI سال 2022، پی ایف آئی پر پابندی کے لیے موضوع بحث رہا
یاد رہے کہ قومی درالحکومت دہلی کی ایک عدالت نے پاپولر فرنٹ آف انڈیا سے منسلک ایک کیس کے سلسلے میں یو اے پی اے اور تعزیرات ہند کی سخت دفعات کے تحت دہلی پولیس کے ذریعہ گرفتار کیے گئے آٹھ افراد کو ضمانت دے دی ہے۔ دہلی پولیس نے اکتوبر کے پہلے ہفتے میں انہیں گرفتار کیا تھا۔ واضح رہے کہ گزشتہ دنوں مرکزی حکومت نے پاپولر فرنٹ آف انڈیا پر 5 سال کی پابندی عائد کی تھی۔ اس سے قبل دہلی پولیس نے بھی 50 مقامات پر چھاپے مارے اور مرکزی ایجنسیوں کے انپٹ کے ساتھ پی ایف آئی سے منسلک 32 افراد کو گرفتار کیا۔
یو این آئی
