ریاست اترپردیش کے ضلع بارہ بنکی میں شہید اودا دیوی کو خراج عقیدت پیش کرنے کے لئے ایک پروگرام منعقد کیا گیا جس میں نائب وزیراعلیٰ کیشو پرساد موریہ نے خطاب کرتے ہوئے مغلوں پر شدید نکتہ چینی کی۔
انہوں نے کہا کہ مغلوں نے پاسی سماج کو خاص طور پر نشانہ بنایا تھا، لیکن پاسی سماج نے اپنی بہادری سے مغلوں کو شکست دی حالانکہ صحافیوں سے گفتگو کے دوران انہوں نے کنگنا رناوت کے بیان پر کوئی رد عمل نہیں دیا۔
کیشو موریہ بارہ بنکی شہر کے شری رام ون کٹیر محلے میں واقع ایک میریج لان سے ویرانگنا اودا دیوی پاسی کے یوم شہادت کے موقع پر منعقد خراج عقیدت پروگرام سے خطاب کر رہے تھے۔
انہوں نے کہا کہ جب سے بی جے پی ریاست میں حکومت میں آئی ہے، تب سے تحریک آزادی کی عظیم ہستیوں کو عزت و احترام سے نوازا جا رہا ہے۔ انہوں کہا بی جے پی حکومت کسی بھی شخصیت کو گم نہیں ہونے دے گی۔ اس لئے آزادی کے امرت مہوتسو کا اہتمام کیا جا رہا ہے۔
مزید پڑھیں:۔ حکومت سنجیدگی سے اپنا کام کر رہی: کیشو پرساد موریہ
انہوں نے پاسی سماج کو راغب کرتے ہوئے کہا کہ ان کی تاریخ سنہری رہی ہے۔ مغلوں نے انہیں خاص طور پر نشانہ بنایا لیکن پاسی سماج نے اپنی بہادری سے انہیں اپنے اوپر حاوی نہیں ہونے دیا۔ انہوں نے اعلان کیا کہ وہ ضلع میں اودا دیوی پاسی کے نام ایک سڑک وقف کریں گے اور ان کی تاریخ کو نصاب میں بھی شامل کیا جائے گا۔
اس موقع پر انہوں نے اعتماد ظاہر کیا کہ بی جے رواں برس بھی 300 سے زیادہ نشستیں حاصل کرکے انتخابات میں کامیابی حاصل کرے گی۔
