رکن پارلیمنٹ موہن ڈیلکر کی لاش آج ممبئی کے مرین ڈرائیو علاقے میں واقع ایک ہوٹل میں ملی۔ اس بات کی اطلاع ملنے کے بعد پولیس جائے واقعہ پر پہنچ گئی ہے۔
ابتدائی تفتیش میں خودکشی کا اندیشہ ظاہر کیا گیا ہے کیونکہ پولیس کو وہاں سے ایک سوسایئڈ نوٹ بھی ملا ہے حالانکہ ابھی تک پولیس نے اس معاملے پر ایسا کوئی بیان جاری نہیں کیا ہے اور معاملے کی جانچ کی جا رہی ہے۔
فی الحال سوسائیڈ کے وجوہات کا بھی پتہ نہیں چلا ہے۔ پولیس نے پوسٹ مارٹم کے لئے لاش کو اسپتال بھیج دیا ہے۔
واضح ہو کہ موہن ڈیلکر کی عمر 58 سال تھی، وہ دادرا اور نگر ہویلی لوک سبھا حلقہ سے آزاد ایم پی تھے۔ سال 1989 میں موہن ڈیلکر پہلی بار اس پارلیمانی حلقے سے ایم پی منتخب ہوئے تھے۔ اس کے بعد کئی بار وہ یہاں سے رکن پارلیمنٹ منتخب ہوئے۔
موہن ڈیلکر بھارتیہ نو شکتی پارٹی سے بھی ایم پی بنے تھے۔ سال 2009 میں انہوں نے کانگریس پارٹی میں شمولیت اختیار کی تھی، حالانکہ گزشتہ لوک سبھا انتخابات یعنی 2019 کے انتخابات میں وہ بطور آزاد امیدوار چناوی میدان میں اترے اور اس میں کامیابی حاصل کی تھی۔
