اس ضمن میں زوہان نالج فاؤنڈیشن کی سرپرستی میں مقامی سطح پر مالیگاؤں پرائیویٹ کوچنگ و نان پرماننٹ ٹیچرس یونین کا قیام عمل میں لایا گیا ہے۔ اس یونین کے بینر تلے پیر کے روز ایڈیشنل کلکٹر دھننجے نکم سے کوچنگ کلاسیس کے ذمہ داران نے ملاقات کی اور بے روزگار اساتذہ کے مسائل سے انہیں آشنا کرایا اور انہیں ایک مطالباتی میمورنڈم دے کر حکام بالا تک پہنچانے کی اپیل کی۔
میمورنڈم میں اس بات کا مطالبہ خصوصی طور پر کیا گیا کہ سال بھر سے کورونا وبا کی وجہ سے اسکولیں اور کوچنگ کلاسیس بند ہیں اور ان میں پڑھانے والے اساتذہ بے روزگار ہیں اور اب ان کے گھروں پر فاقے کی نوبت تک آچکی ہے، لہٰذا ان حالات میں حکومت ان معمارانِ قوم کا خیال رکھے اور انہیں بیس ہزار روپیہ بھتہ دے۔
اس طرح کا مطالبہ زوہان نالج ہب، رہبر کوچنگ کلاسیس، بیسٹ کوچنگ کلاسیس، گیلکسی کمپیوٹر کلاسیس، فیمس کوچنگ کلاسیس، تحریک کلاسیس، گلیکسی کوچنگ کلاسیس سمیت مالیگاؤں کی تمام کلاسیس کی جانب سے کیا گیا۔
