مرکزی وزیر دھرمیندر پردھان نے آج یہاں نیشنل انسٹی ٹیوٹ رینکنگ فریم ورک کے ذریعے قائم انڈیا رینکنگس 2021 جاری کی۔ جس میں انڈین انسٹی ٹیوٹ آف ٹکنا لوجی، مدراس لگاتار تیسرے سال بھی مجموعی زمرے اور انجینئرنگ میں اول مقام پر برقرار رہا، جب کہ منی پال کالج آف ڈینٹل سائنس منی پال نے ڈینٹل زمرے میں پہلا مقام حاصل کیا۔
اس موقع پر اظہار خیال کرتے ہوئے پردھان نے کہا کہ ایک مضبوط اور رول ماڈل رینکنگ فریم ورک عالمی تعلیم میں بھارت کے تعاون کے طور پر کام کرے گا۔ ہمیں اس بات کو یقینی بنانا چاہیے کہ ہماری رینکنگ فریم ورک نہ صرف ملک میں بلکہ عالمی سطح پر بھی، خاص طور پر ترقی پذیر معیشتوں کے لیے بینچ مارک کے طور پر ابھرے۔ انہوں نے علاقائی رینکنگ فریم ورک کو تیار کرنے پر بھی زور دیا۔
