دہلی: چیف جسٹس آف انڈیا نے بدھ کے روز کہا کہ وہ جلد ہی حجاب کیس کا نوٹس لیں گے جو کرناٹک کے کالج کیمپس میں مسلم طالبات کے حجاب (ہیڈ اسکارف) پہننے پر پابندی سے متعلق ہے۔ اس کیس کا تذکرہ چیف جسٹس آف انڈیا (سی جے آئی) ڈی وائی چندرچوڑ کے سامنے ایڈوکیٹ شادان فراسات نے کیا جنہوں نے کہا کہ لڑکیاں سرکاری کالجز میں حجاب پر پابندی کی وجہ سے امتحانات میں شرکت نہیں کر پا رہی ہیں۔
فراسات نے عدالت کو بتایا کہ لڑکیاں پہلے ہی ایک سال کھو چکی ہیں اور آئندہ امتحانات 9 مارچ کو ہیں۔ سی جے آئی نے کہا کہ میں اس پر نوٹس لوں گا۔ اس کیس کا تذکرہ پہلے سینئر ایڈوکیٹ میناکشی اروڑہ نے 23 جنوری کو کیا تھا، جنہوں نے عدالت کو بتایا تھا کہ اس ماہ پریکٹیکل امتحانات ہونے والے ہیں جن کے لیے کیس سے متاثرہ مسلم طالبات کو حاضر ہونا تھا۔ اس لیے اس معاملے میں عبوری ہدایات کی ضرورت تھی تاکہ متاثرہ طالبات امتحانات میں شرکت کر سکیں۔
