جالندھر: پنجاب میں جالندھر لوک سبھا کے ضمنی انتخاب سے قبل کانگریس کے جالندھر کے سابق ایم ایل اے سشیل کمار رنکو نے عام آدمی پارٹی کے قومی کنوینر اروند کیجریوال، پنجاب کے وزیر اعلی بھگونت مان، ایم پی راگھو چڈھا کی موجودگی میں عام آدمی پارٹی میں شمولیت اختیارکرلی ہے۔کیجریوال اور وزیر اعلی مان نے بدھ کو وزیر اعلی رنکو کا عآپ پارٹی میں شامل ہونے پر رسمی طور پر خیرمقدم کیا اور بعد میں میڈیا سے خطاب کرتے ہوئے وزیر اعلی مان نے کہا کہ عام آدمی پارٹی کی فیملی دن بہ دن بڑھ رہی ہے اور مضبوط ہو رہی ہے۔ انہوں نے کہا کہ جو لوگ ملک کے عوام کی خدمت کرنا چاہتے ہیں انہیں آپ پارٹی میں ہمیشہ خوش آمدید کہا جاتا ہے۔مان نے کہا کہ کیجریوال ایک انقلابی وزیر اعلیٰ ہیں اور ملک کے 130 کروڑ عوام کے لیے امید کی کرن ہیں۔
انہوں نے کہا کہ ہم تعلیم، صحت کی سہولیات، روزگار، انفراسٹرکچر اور ترقی کے لیے سیاست میں آئے ہیں، ہم نفرت کی سیاست نہیں کرتے۔ انہوں نے کہا کہ کیجریوال واحد سیاست دان ہیں جو پانچ سال بعد عوام کے پاس گئے اور کہا کہ اگر آپ کو پچھلے سال کی آپ حکومت کا کام پسند ہے تو انہیں ووٹ دیں اور دہلی کے لوگوں نے انہیں اس سے بھی بڑا مینڈیٹ دیا ہے، جو اس بات کا ثبوت ہے۔ اس موقع پر جناب کیجریوال نے سشیل کمار رنکو کا عام آدمی پارٹی میں خیرمقدم کیا اور پنجاب میں مان حکومت کے کام کی تعریف کی۔
