گیلانی کی وفات پر وادی میں کرفیو نافذ

سرینگر سمیت دیگر اضلاع میں پولیس اور سی آر پی ایف کی بھاری نفری تعینات کی گئی ہے جبکہ میڈیا کو بھی حیدر پورہ کی جانب جانے کی اجازت نہیں دی جا رہی ہے۔ اس کے علاوہ موبائل انٹرنیٹ سروس بھی بند کر دی گئی ہے۔

بزرگ علیٰحدگی پسند رہنما سید علی گیلانی کی وفات پر وادی کشمیر میں کرفیو نافذ کیا گیا ہے جبکہ مواصلاتی نظام بھی معطل کیا گیا ہے۔

گیلانی کا انتقال بدھ کے شام 10 بجے اپنی رہائش گاہ پر ہوا جس کے بعد انتظامیہ نے کرفیو نافذ کیا۔

92 سالہ گیلانی گذشتہ 12 برسوں سے گھر میں نظر بند تھے جس کی وجہ سے ان کی صحت بھی متاثر ہوئی تھی۔سرینگر سمیت دیگر اضلاع میں پولیس اور سی آر پی ایف کی بھاری نفری تعینات کی گئی ہے جبکہ جگہ جگہ پر ناکہ بندی کی گئی ہے۔ گیلانی کی تدفین رات کے 4 بجے کے قریب کی گئی جس میں ان کے قریبی رشتہ دار اور اقارب موجود تھے۔

ان کی تدفین پولیس کی سخت نگرانی میں ہوئی اور اقربا کے علاوہ کسی بھی دیگر شخص کو ان کی اخری رسومات میں شامل ہونے کی اجازت نہیں دی گئی۔