مہاراشٹر کے شہر مالیگاؤں میں واقع قدوائی روڈ بازار علاقے میں گٹر کے ابلنے سے سڑکیں اور رہائشی علاقے گندے پانی کے تالاب میں تبدیل ہوگئے۔ اس علاقے کی عوام نے مقامی کارپوریٹرز پر الزام عائد کیا کہ انکی نااہلی کے سبب بنا بارش کے سڑکیں تالاب بن گئی ہیں۔
گٹر کے پانی کی وجہ سے مقامی افراد بے حد پریشان ہیں۔ ایسے میں مقامی لوگوں کے ساتھ ساتھ راہگیروں اور دکانداروں کو بھی گندے پانی سے گزرنے پر مجبور ہونا پڑ رہا ہے۔
اس تعلق سے اسامہ عظمی نے نمائندے ای ٹی وی بھارت کو بتایا کہ گزشتہ کچھ ماہ سے قدوائی روڈ بازار علاقے کی عوام اس پریشانی سے جونج رہی ہے۔ انہوں نے کہا کہ وہ اس کی شکایت کئی مرتبہ کارپوریٹرز اور کارپوریشن کے اعلیٰ افسران سے کرچکے ہیں لیکن اس کے بعد بھی مقامی کارپوریٹرز اور کارپوریشن انتظامیہ اس مسئلے کو مسلسل نظر انداز کررہی ہے۔
اسامہ عظمی نے بتایا کہ اس وارڈ کے کارپوریٹر شہر کے الگ الگ مسئلہ کو لے کر ہمیشہ متحرک رہتے ہیں۔ لیکن کبھی اپنے وارڈ میں متحرک نہیں ہوتے۔ انہوں نے کہا کہ اس گندے پانی کی نکاسی کیلئے کوئی مستقل حل نکالا جائے ورنہ وہ مقامی لوگوں کو لے کر احتجاج کرینگے۔
