یاسر شاہ ، مشتاق احمد کے ساتھ اپنی گگلی اور دیگر مختلف حالتوں پر کام کر رہے ہیں ، جو ان کے اسپن بولنگ کوچ کی حیثیت سے پاکستان اسٹاف میں شامل ہیں۔
یاسر شاہ نے کہا ہے کہ وہ انگلینڈ کے خلاف اگلے ماہ سے شروع ہونے والی ٹیسٹ سیریز سے قبل اپنی گگلی اور بیٹنگ پر کام کررہے ہیں، امید ہے کہ انگلینڈ میں خشک وکٹیں ان کے گگلی کیلئے مدد گار ثابت ہوں گی۔
جمعرات کو انٹرنیشنل کرکٹ کونسل (آئی سی سی) کی ویب سائٹ پر یاسر شاہ نے کہا کہ میری گگلی اچھی حالت میں آ رہی ہے۔ دو روزہ میچ میں میں نے جو بھی گگلی کیں وہ اچھی رہی ہیں۔ میرے خیال میں یہ میرا سب سے اہم ہتھیار ہوگا۔ انگلینڈ میں عام طور پر اگست اسپنر کیلئے سازگار ہوتا ہے اور اسپنرز کی توقع ہوتی ہے کہ وہ زیادہ وکٹ حاصل کریں۔
یاسر شاہ نے کہا کہ کاؤنٹی عام طور پر جولائی سے ستمبر کیلئے اسپنرز کے ساتھ معاہدہ کرتی ہیں کیونکہ ان تین ماہ میں اسپنرز کو خشک پچ پر وکٹ حاصل کرنے میں مدد ملتی ہے۔
یاسر نے مزید کہا کہ انہیں امید ہے کہ وکٹیں اسپنرز کی مدد کریں گی۔ یاسر اپنی بلے بازی پر بھی کام کر رہے ہیں اور ٹیسٹ میں قیمتی رنز بنانے کا ارادہ کررہے ہیں جیسے انہوں نے گذشتہ سال آسٹریلیا کے خلاف سنچری اسکور کی تھی. انہوں نے کہا کہ میں نیٹ میں اپنی بیٹنگ پر کام کر رہا ہوں۔
جب ٹیم کو آپ کی ضرورت ہو تو آپ کو اس حوالے سے قدم اٹھانا ہوگا۔ لہٰذا میرے پاس انگلینڈ میں سنچری بنانے کا ہدف ہے۔ اگر میں ایڈیلیڈ میں سنچری بنا سکتا ہوں تو میں یہاں پر بھی اسی کارکردگی کو دہرا سکتا ہوں ۔ تین میچوں کی ٹیسٹ سیریز کا پہلا میچ 5 اگست کو مانچسٹر میں شروع ہوگا جب کہ ساؤتھمپٹن اگلے دو میچوں کی میزبانی کرے گا۔
