فرسٹ پوسٹ ٹرسٹ سروے میں مودی سب سے آگے

فرسٹ پوسٹ ٹرسٹ سروے میں یہ بات کھل کر سامنے آگئی ہے کہ وزیراعظم کے طور پر ملک کی پہلی پسند اب بھی مودی ہی ہیں۔ 2 سے 22 مارچ کے درمیان 30 ریاستوں کے 31 ہزار ووٹرز سے بات کی گئی جس میں یہ آشکار ہوا کہ فی الوقت مودی کا رتھ سب سے آگے ہے اور انہیں پیچھے کرنے والے کافی پیچھے ہیں۔

لوک سبھا انتخابات میں تمام سیاسی پارٹیاں اپنی اپنی پالیسیوں اور اپنے انتخابی منشور کے ساتھ میدان میں کود پڑی ہیں اور بی جے پی کو شکست سے دوچار کرنے کے لیے ہر ممکن کوششیں کی جارہی ہیں لیکن حالیہ سروے رپورٹ میں یہ بات سامنے آئی ہے کہ ملک میں اب بھی 'مودی میجک' چل رہا ہے اور عام لوگوں میں مودی کی مقبولیت برقرار ہے۔ عظیم اتحاد اورکانگریس مل کر وزیراعظم مودی کو ہرانا چاہتی ہیں۔ تاہم ان سب کے درمیان فرسٹ پوسٹ ٹرسٹ سروے میں عوام نے صاف کردیا ہے کہ مودی کا مقابلہ فی الوقت کسی سے نہیں ہے۔

فرسٹ پوسٹ ٹرسٹ کے سروے میں 63.4 فیصد لوگ چاہتے ہیں کہ نریندرمودی ایک بار پھرسے وزیراعظم بنیں۔

وزیراعظم کی دوڑ میں دوسرے نمبرپر راہل گاندھی ہیں، لیکن مقبولیت کی دوڑ میں راہل گاندھی مودی سے بہت پیچھے ہیں۔ صرف 16.1 فیصد لوگ راہل گاندھی کو وزیراعظم کے طورپردیکھنا چاہتے ہیں۔

اس سروے میں مودی سب سے آگے ہیں لیکن انتخابات سے قبل کچھ بھی کہنا مناسب نہیں کیوں کہ عوام کا موڈ کب بدل جائے اور کون سا ایشو حاوی ہوجائے یہ بھی کہنا قبل از وقت ہوگا۔