شکراوا گاؤں کی گلیوں سے کرکٹ کا سفر شروع کرنے والے آئی پی ایل فریچائزی رائل چیلینجرز بنگلور ٹیم کے آل راؤنڈر شہباز احمد نے اپنے پہلے ہی میچ میں بہتر کارکردگی سے سرخیاں بٹور لی ہیں۔
بنگلور اور راجستھان کے مابین آئی پی ایل میچ میں جیسے ہی شہباز احمد کو آخری 11 کھلاڑیوں میں شامل کرنے کی خبر ملی تو ان کا پورا گاؤں تالیوں سے گونج اٹھا اور سبھی لوگ شہباز کی بہتر کارکردگی کی دعائیں کرنے لگے۔
پھر وہ لمحہ آیا جس کا سب کو انتظار تھا۔ میچ کے دوران جب شہباز احمد نے شاندار کیچ پکڑا تو پورے گاؤں والوں نے بے تحاشہ تالیاں بجائی۔ ایک جانب گاؤں میں تالیاں بج رہی تھیں تو وہیں گراؤنڈ پر وراٹ کوہلی اور اے بی ڈویلیئرز جیسے کھلاڑی شہباز کی تعریف کررہے تھے۔
اس ایک کیچ کے بعد گاؤں کے لوگوں نے رات میں ہی مٹھائیاں بانٹ کر خوشی کا اظہار کیا۔
حالانکہ آل راؤنڈر شہباز احمد کو اپنے پہلے آئی پی ایل میچ میں بلے بازی کا موقع نہیں ملا لیکن گیند بازی کرتے ہوئے اس نے 2 اوورز میں 18 رنز دیئے۔
- اب آپ کو بتاتے ہیں شہباز احمد کی نجی زندگی اور ان کے کرکٹ کریئر کے بارے میں
شہباز احمد 11 دسمبر 1994 کو شکراوا گاؤں میں احمد جان کے گھر پیدا ہوئے۔ ان کے دادا بھی کرکٹ کے بڑے مداح ہیں۔ شہباز کے دادا نے بتایا کہ شہباز کو تعلیم سے زیادہ کرکٹ کا شوق تھا۔ انہوں نے بتایا کہ شہباز بچپن سے ہی کرکٹ کا شوقین تھا۔ پڑھائی سے زیادہ کرکٹ کے میدان میں زیادہ ملتا تھا۔
شہباز احمد کے چچا اور کوچ محمد فاروق نے بھی علاقے میں کرکٹ کھیل کر بہت نام کمایا ہے۔ انہی کے نقش قدم پر چلتے ہوئے شہباز احمد ان سے کئی قدم آگے نکل گئے۔ شہباز نے چھوٹی عمر سے ہی کھیلنا شروع کیا تھا۔ ان کے چچا نے اسے کم عمر ٹریننگ دینی شروع کی اور کرکٹ کی باریکیوں کے بارے میں بتایا۔
شہباز کے چچا محمد فاروق نے بتایا کہ جیسے ہی گاؤں اور آس پاس کے علاقے میں شہباز کا نام مشہور ہوا اس کے بعد شہباز نے پیچھے مڑ کر نہیں دیکھا۔ نہ صرف وجے ہزارے ٹرافی بلکہ سید مشتاق علی ٹرافی میں ان کی کارکردگی کی چاروں طرف تعریف ہونے لگی۔
جب بھارتی کرکٹ ٹیم کے سابق سورو گنگولی اور مشہور کرکٹر وی وی ایس لکشمن کی نظر اس ابھرتے ہوئے کھلاڑی پر پڑی تو سال 2017 میں انہیں بنگال کرکٹ ٹیم کی انڈر 23 ٹیم میں منتخب کیا گیا۔ اس کے بعد شہباز نے ایک کے بعد ایک بہت ساری کامیابیاں حاصل کیں۔
رواں برس شہباز احمد کو رائل چیلینجرز نے 20 لاکھ روپے میں اپنی ٹیم میں شامل کیا۔ جیسے ہی شہباز کو راجستھان کے خلاف میچ میں کھیلنے کا موقع ملا تو پھر جو ہوا اس بات کا گواہ پورا ملک ہے۔
شہباز کی والدہ شبنم بیگم اور والد احمد جان کو یقین ہے کہ اب ان کا بیٹا ایک دن بھارت کی قومی کرکٹ ٹیم میں جگہ بنا کر نوح کا نام پوری دنیا میں روشن کرے گا۔
دوسری جانب علاقے کے لوگ توقع کر رہے ہیں کہ آر سی بی کے کپتان وراٹ کوہلی شہابز کو آئندہ میچوں میں بھی موقع دیں گے
