دہلی پولیس کی اسپیشل ٹیم نےعلی الصبح پرہلادپور میں ایک مڈبھیڑ کے بعد انعامی بدمعاش آشیش بکر والا کو گرفتار کر لیا۔
اسپیشل سیل کے ایک اعلیٰ افسر نے بتایا کہ 'پرہلادپور کے علاقے میں ایک لاکھ روپے کا بدنام زمانہ بد معاش آشیش بکر والا کو ایک مڈبھیڑ کے بعد گرفتار کر لیا گیا ہے۔ مڈبھیڑ کے دوران آشیش کی ایک ٹانگ میں گولی لگی ہے۔ اسے علاج کے لئے اسپتال میں داخل کرایا گیا ہے'۔
دہلی پولیس ہفتہ وصولی کے دو معاملوں میں اس کی تلاش کر رہی تھی۔ پولیس نے آشیش کے قبضہ سے ایک پستول بھی برآمد کیا ہے۔
قابل غور بات یہ ہے کہ آشیش ایک مشہور گاڑی چور منوج بکر والا کا بیٹا ہے اور اپنے والد کے نقش قدم پر چلتے ہوئے جرائم کی دنیا میں اپنا تسلط قائم کرنے کے لئے ہفتہ وصولی اور قتل کی وارداتوں کو انجام دیتا رہا تھا۔
