چائلڈ پورنوگرافی پر موثر پابندی لگانے کا مطالبہ :کیلاش سونی

راجیہ سبھا میں چائلڈ پورنوگرافی کا معاملہ اٹھایا گیا اور اس کی وجہ سے نابالغوں اور نوجوانوں پر پڑنے والے برے اثرات کے سلسلے میں گہری تشویش کا اظہار کیاگیا۔

بھارتیہ جنتا پارٹی کے کیلاش سونی نے منگل کو وقفہ صفر کے دوران ایوان میں اس معاملے کو اٹھایا اور کہا کہ حکومت چائلڈ پورنوگرافی پر روک لگانے کے سلسلے میں سنجیدہ ہے اور 857 سائٹ پر پابندی لگا دی گئی ہے۔

انہوں نے کہاکہ اس کے باوجود چائلڈ پورنوگرافی سے جڑی فلمیں لوگ انٹرنیٹ کے ذریعہ سے دیکھ رہےہیں۔اس کے اثر میں آکر مجرمانہ واقعات کو انجام دئےجانے کی خبریں ملتی رہتی ہیں۔

انہوں نے دہرادون، بھوپال اور بہار کی کچھ مجرمانہ واردات کا ذکر کرتے ہوئے کہاکہ' جانچ کے بعد پتہ چلا ہے کہ ان وارداتوں کےپیچھے کہیں نہ کہیں چائلڈ پورنوگرافی بھی ایک وجہ رہی ہے۔انہوں نے حکومت سے چائلڈ پورنوگرافی پر روک لگانے کےلئے اور سخت قانون بنانے کا مطالبہ کیا۔

چیئرمین ایم وینکئیا نائیڈو نے بھی اس مسئلے پر تشویش کا اظہار کیا اور کہا کہ ارکان اسمبلی کی ایک کمیٹی نے اس مسئلے پر غور و خوض کرکے رپورٹ سونپی ہے۔انہوں نے کہاکہ امید ہے کہ جلد ہی چائلڈ پورنوگرافی پر موثر روک لگانے کےلئے سخت قدم اٹھائے جائیں گے۔