کورونا وائرس کے بڑھتے انفیکشن کے پیش نظر ایوان کی کارروائی مقررہ وقت سے پہلے ہی ختم کرنی پڑی۔
بجٹ اجلاس 31 جنوری سے شروع ہوا تھا، اس کا پہلا مرحلہ 11 فروری تک چلا جس میں مالیاتی بل سال 21-2020 کا بجٹ پیش کیا گیا اور بجٹ پر عام بحث ہوئی۔
بجٹ سیشن کے دوسرے مرحلے کا آغاز 2 مارچ سے ہوا تھا اور پہلے سے طے شدہ پروگرام کے مطابق تین اپریل تک میٹنگ ہونی تھی لیکن لوک سبھا اسپیکر اوم برلا نے ایوان کی کارروائی آج ہی غیر معینہ مدت تک کے لیے ملتوی کردی، اس وقت وزیراعظم نریندر مودی بھی ایوان میں موجود تھے۔
پارلیمانی امور کے ریاستی وزیر ارجن رام میگھوال نے کہا کہ 'سبھی پارٹیوں کے لیڈروں کے ساتھ آج صبح میٹنگ میں اس بات پر اتفاق ہوا تھا کہ ناموافق حالات کے پیش نظر مالیاتی بل بغیر بحث کے منظور کیا جائے گا۔
اسپیکر اوم برلا نے بتایا کہ 'اس سیشن کے دوران 23 نشستوں میں 16 سرکاری بل ایوان میں پیش کیے گئے جس میں سے 13 بل منظور ہوئے۔
ایوان نے دیر رات تک بیٹھ کر 21 گھنٹے 41 منٹ فاضل کام کیا اور مجموعی طور پر 109 گھنٹے 23 منٹ کام ہوا۔
آج بجٹ پر 11 گھنٹے 51 منٹ بحث ہوئی، مالی سال 21-2020 کے لیے وزارت ریلوے سے متعلقہ گرانٹ مطالبات پر 12 گھنٹے 31 منٹ، سماجی انصاف اور تفویض اختیارات کے مطالبات پر پانچ گھنٹے 21 منٹ اور وزارت سیاحت کے مطالبات پر چار گھنٹے ایک منٹ بحث ہوئی، دیگر وزارت کے مطالبات زر اور اس سے متعلق تخصیصی بلز کو 16 مارچ کو گلوٹین کے ذریعہ منظوری دی گئی۔
