آسام کے قاضی رنگا نیشنل پارک میں تعینات عملے نے پارک کے علاقے میں گینڈے کی لاش برآمد کی ہے۔
پارک کے حکام کے مطابق پارک کے کل 243 کیمپوں میں سے 143 کیمپ سیلاب کی زد میں آگئے ہیں۔ وہیں دوسری طرف بہت سے جنگلی جانور جن میں سے ایک گینڈا، ہرن، ہاتھی شامل ہیں، انہیں بحفاظت بالائی علاقوں اور قریب کے اونچے علاقوں میں منتقل کردیا گیا ہے۔
پارک حکام اور ضلعی انتظامیہ نے نیشنل ہائی وے 37 پر تمام گاڑیوں کی رفتار کی حد کو محدود کردیا ہے۔
پارک اتھارٹی نے رفتار کی حد کی خلاف ورزی کرنے والوں کے خلاف 5 ہزار جرمانہ بھی عائد کرنے کا فیصلہ کیا ہے۔
رفتار کی حد پر عمل کرنا ضروری ہے کیونکہ مختلف جانور سیلاب کے دوران بالائی زمین کی تلاش میں پارک کے دوسری طرف جانے کی کوشش کرتے ہیں اور ایسے میں وہ تیز رفتار گاڑیوں کی زد میں آجاتے ہیں۔
آسام کے قاضی رنگا نیشنل پارک میں گینڈوں کی آبادی دنیا میں سب سے زیادہ ہے۔
شدید بارش کی وجہ سے آسام کے تقریباً 25 اضلاع سیلاب سے متاثر ہوئے ہیں، جس سے ریاست کی عوام کو بہت نقصان پہنچا ہے۔
