جمعیت علماء ہند کے صدر مولانا قاری سید محمد عثمان منصور پوری نے شمال مشرقی دہلی کے فساد زدہ علاقوں کا دورہ کیا اور گدھا پوری چوک حلقے میں جمعیت کے زیر اہتمام تیار کردہ 48 مکانات اور 18 دکانوں کا افتتاح کیا۔
جمعیت علمائے ہند کے صدر نے طیبہ مسجد میں نماز پڑھنے کے بعد مکانات کا افتتاح کیا۔
اس موقع پر صدر جمعیت علماء ہند نے کہا کہ شمال مشرقی دہلی کے فساد متاثرین معاشی بحران کا شکار ہیں اس لیے جمعیت علمائے ہند کی جانب سے فساد زدگان کے گھروں کی تعمیر نو کرکے انہیں سپرد کیا گیا۔
مولانا عثمان منصور پوری نے ای ٹی وی بھارت کے نمائندے سے بات کرتے ہوئے بتایا کہ 'جمعیت علماء ہند آغاز سے ہی فساد زدگان کی مدد کرنے میں مصروف ہے ہم نہ صرف ان کے مقانات تعمیر کرائے بلکہ روز گار فراہم کرانے کی بھی پوری کوشش کی ہے'۔
انہوں نے مزید کہا کہ 'علاوہ ازیں جن لوگوں کے ساتھ زیادتی ہوئی ہے انہیں انصاف دلانے کے لیے بھی جمعیت مکمل طور ان کے ساتھ ہے اور جنہیں ایف آئی آر درج کرانے میں یا پولیس سے متعلق معاملات میں مدد کی ضرورت تھی، ہم مدد کر رہے ہیں'۔
