دہلی انتخابات : ای وی ایم کے تعلق سے شکایت

مٹیا محل حلقہ اسمبلی میں پولنگ بوتھ نمبر 109 ، 110 اور 111 پر عوام کا کہنا ہے کہ 'جب وہ ووٹ ڈالنے کے لئے اندر جا رہے ہیں اور ووٹ ڈالنے کے لیے بٹن دبا رہے ہیں تب کسی بھی پارٹی کو دیا گیا ووٹ بی جے پی کو جارہا ہے۔'

اس بات کی شکایت عوام نے الیکشن کمیشن کی جانب سے آئے ہوئے افسران سے بھی کی لیکن اس کے باوجود عوام میں ناراضگی نظر آرہی ہے۔ رائے دہندگان کا کہنا ہے کہ 'ہم ووٹ کے لیے کسی دوسری پارٹی کا بٹن دباتے ہیں اور جب پرچی نکل آتی ہے تو اس پر بی جے پی کا نشان ہوتا ہے۔'

متعدد شکایات کے باوجود بھی اس مسئلہ کو حل نہیں کیا گیا حالانکہ دو سے تین بار مشینوں کو تبدیل کیا گیا لیکن اس کے باوجود وہ پریشانی مسلسل برقرار ہے۔

عوام کا کہنا ہے کہ یہ بی جے پی کو جتوانے کی سازش ہے۔ مقامی افراد کا کہنا ہے کہ جب بی جے پی کو یہ لگا کہ عام آدمی پارٹی دہلی میں حکومت بناسکتی ہے تو انہوں نے آخری حربہ کے طور پر ای وی ایم مشینوں میں چھیڑ چھاڑ شروع کردی۔