کانگریس نے اعلان کیا ہے کہ وبائی مرض کورونا وائرس کے دوران امتحانات منعقد کرانے کے حکومتی فیصلے کے خلاف 28 اگست کو ملک گیر احتجاج کیا جائے گا۔
ایک بیان میں اے آئی سی سی کے جنرل سکریٹری کے سی وینوگوپال نے کہا کہ 'اس اقدام کے ذریعے حکومت کے آمرانہ قدم کی سخت مخالفت کی جائے گی'۔
مرکزی حکومت کے اس فیصلے کی مخالفت کے لیے کانگریس پارٹی آن لائن مہم چلائی گی۔ وہ ریاستوں اور ضلعی ہیڈ آفس پر ملک گیر مظاہرے کرنے جارہی ہے۔
کانگریس کے جنرل سکریٹری کے سی وینوگوپال کی جانب سے جاری کردہ ایک بیان میں کہا گیا ہے کہ 'ملک بھر سے لاکھوں طلباء اور والدین مطالبہ کرتے ہیں کہ جے ای ای اور این ای ای ٹی کے امتحانات کو ملتوی کردیا جائے'۔
اس میں کہا گیا ہے کہ 'کووڈ کا بحران بڑھ رہا ہے۔ تاہم بے حس مرکزی حکومت ان امتحانات کے انعقاد کے فیصلے کے ساتھ ڈٹی ہوئی ہے'۔
واضح رہے کہ جے ای ای کو یکم سے چھ ستمبر تک طئے کیا گیا ہے، جبکہ نیٹ 13 ستمبر کو ہوگا۔
گزشتہ ہفتے 11 ریاستوں کے 11 طلباء کی جانب سے امتحان ملتوی کرنے کا مطالبہ کیا گیا تھا۔ تاہم عدالت نے اسے مسترد کر دیا۔ اس فیصلے نے نامزد مراکز میں کووڈ انفیکشن کے خوف کی وجہ سے ایک بہت بڑی تشویش پیدا کردی ہے۔
کانگریس کے عبوری صدر سونیا گاندھی نے بھی اس معاملے پر بات کرنے کے لئے ہم خیال جماعتوں کے وزرائے اعلی سے میٹنگ کی۔
تمام وزرائے اعلیٰ نے اجتماعی طور پر اس اقدام کی مخالفت کرنے کی ضرورت پر زور دیا ہے اور فیصلہ کیا گیا ہے کہ ریاستی حکومتیں نظرثانی کی درخواست دائر کرنے کے لئے سپریم کورٹ جائیں گی۔
