متحدہ کسان مورچہ نے آج بھارت بند کی کال دی ہے۔ کسان رہنما بھارت بند کو کامیاب بنانے میں مصروف ہیں۔ غازی پور بارڈر پر بیٹھے مشتعل کسانوں نے دہلی-میرٹھ ایکسپریس وے کو مکمل طور پر بلاک کر دیا ہے۔ کسان دہلی-میرٹھ ایکسپریس وے پر بیٹھے ہیں۔
کسانوں کے احتجاج کے باعث دہلی سے غازی آباد آنے والے دہلی میرٹھ ایکسپریس وے کے تمام راستوں کو پولیس نے پیچھے سے بند کر دیا ہے اور ٹریفک کا رخ موڑ دیا گیا ہے۔
واضح رہے کہ کسانوں نے آج بھارت بند کا اعلان کیا ہے۔ کسانوں کی تحریک کئی مہینوں سے جاری ہے۔ زرعی قوانین کے خلاف کسان اب بھی سڑکوں پر بیٹھے ہیں۔ ان کا مطالبہ یہ ہے کہ تینوں زرعی قوانین کو واپس لیا جائے۔ حکومت سے کئی مواقع پر مذاکرات ہوئے لیکن تمام مذاکرات بے نتیجہ ثابت ہوئے۔
مزید پڑھیں:۔ پنجاب: 27 ستمبر کو سڑک و ریل ٹریفک ٹھپ رہے گا
بہار میں راشٹریہ جنتادل ( آرجے ڈی ) زیر قیادت مہا گٹھ بندھن کی سبھی حلیف جماعتوں نے زرعی قوانین کے خلاف احتجاج میں کسانوں کی اپیل پر آج بھارت بند کی حمایت کا اعلان کیا ہے۔
گزشتہ جمعہ کو اسمبلی میں اپوزیشن رہنماء تیجسوی پرساد یادو نے آرجے ڈی، کانگریس، سی پی آئی، سی پی آئی ایم ایل کے رہنماوں کی موجودگی میں منعقدہ پریس کانفرنس میں اس کی جانکاری دی۔
انہوں نے کہا تھا کہ مہا گٹھ بندھن کسانوں کے بھارت بند کی حمایت کرے گا اور پارٹی کے رہنما بھی بند کے دوران مظاہرے میں شامل ہوں گے۔ انہوں نے کہا کہ کسانوں کی اپیل پر بھارت بند کو کامیاب بنانے کیلئے مہا گٹھ بندھن کی سبھی حلیف جماعتوں کے رہنما بھی شامل ہوں گے۔
