گیا: سخت سکیورٹی کے درمیان جامع مسجد کے سامنے سے مورتی وسرجن جلوس نکالا گیا

شہر گیا میں درگا کی مورتی ویسرجن جلوس پُرامن ماحول میں گزارا گیا ہے۔ وسرجن جلوس کا آغاز کل شام سے ہی ہوگیا تھا جو آج بھی جاری ہے۔ شہر کے سب سے حساس مقام جامع مسجد کے سامنے سے گزرنے والی مورتیاں پولیس کی سخت نگرانی میں گزاری گئیں۔

ریاست بہار کے ضلع گیا میں پُرامن ماحول کے درمیان دسہرہ منایا گیا ہے، پُرامن ماحول میں مورتی وسرجن بھی ہورہی ہے، شہر کے دکھرنی مندر و جامع مسجد کے سامنے سے سخت حفاظتی بندوبست کے دوران مورتیاں پاس کرائی گئیں۔

گیا کے ڈومریا بلاک کو چھوڑ کر سبھی جگہوں پر پُرامن ماحول میں دسہرہ منایا گیا ہے، گیا ہیڈ کوارٹر سے 80 کلومیٹر دور ڈومریا میں بھنڈارے کے دوران جھڑپ ہوئی تاہم پولیس کی مستعدی اور علاقے کے سماجی کارکن کی پہل پر کشیدگی کو پھیلنے سے روک لیا گیا۔ ڈومریا میں حالات پرسکون ہیں تاہم پولیس کی تعیناتی ابھی ہے۔

اطلاع کے مطابق ڈومریا بازار میں پوجا پنڈال بنایا گیا تھا، یہاں بھنڈارے کا بھی انتظام کیا گیا تھا اسی دوران ہجوم میں بدمعاشوں نے کسی بات کو لیکر فائرنگ کی جس کی زد میں چار افراد آگئے اور وہ زخمی ہوگئے. ابتدائی علاج کے بعد سبھی کو گیا انوگرہ نارائن ہسپتال ریفر کردیا گیا ہے۔ ایس ایس پی ادتیہ کمار نے بتایا کہ واقعہ کے بعد پولیس نے کارروائی کرتے ہوئے دو افراد کو گرفتار کیا ہے جن سے پوچھ تاچھ کے بعد جیل بھیج دیا گیا ہے۔ سبھی زخمی خطرے سے باہر ہیں۔ ایف آئی آر درج کرلی گئی ہے اور بقیہ لوگوں کی گرفتاری کے لیے چھاپے ماری کی جارہی ہے۔


شہر گیا میں درگا کی مورتی وسرجن جلوس پُرامن ماحول میں گزارا گیا ہے۔ وسرجن جلوس کا آغاز کل شام سے ہی ہوگیا تھا جو آج بھی جاری ہے۔ شہر کے سب سے حساس مقام جامع مسجد کے سامنے سے گزرنے والی مورتیاں پولیس کی سخت نگرانی میں گزاری گئیں۔ سینکڑوں پولیس جوانوں کے ساتھ ضلع کے سبھی اعلیٰ حکام یہاں موجود تھے حالانکہ یہاں پولیس کے سخت انتظامات اور کورونا پروٹوکول پر عمل درآمد کرانا مورتی جلوس میں شامل کچھ لوگوں کو ناگوار گزرا، جس کی وجہ سے پولیس اور جلوس میں شامل لوگوں کے درمیان ہلکی جھڑپ بھی ہوئی ہے تاہم پولیس نے فوری طور پر حالات پر قابو پالیا۔