متحدہ عرب امارات میں رہنے والے بھارتی کاروباری ایس پی سنگھ اوبرائے اس وقت حیران رہ گئے جب امرتسر سے دبئی جانے والے ائیر انڈیا کے جہاز میں اکانومی کلاس کے ٹکٹ سے سفر کرنے کے دوران انہوں نے اپنے آپ کو اکیلا پایا۔
ایک عہدیدار نے بتایا کہ اوبرائے بدھ کے روز تین بج کر 45 منٹ پر امرتسر سے اڑان بھرنے والے ائیر انڈیا کے جہاز میں واحد مسافر تھے۔ دبئی جانے والے اس طیارے میں انہوں نے تین گھنٹے کا سفر طئے کیا۔ اوبرائے کے پاس گولڈن ویزا ہے، جس سے انہیں 10 سال تک متحدہ عرب امارات میں رہنے کی منظوری مل گئی ہے۔
مزید پڑھیں:اسپائس جیٹ کی میگا مانسون سیل، 999 روپے میں ہوائی سفر کی پیش کش
اڑان کے دوران انہوں نے فلائٹ عملہ کے ساتھ تصویریں بھی کھینچوائی۔گزشتہ پانچ ہفتوں میں یہ تیسری بار ہے جب دبئی جانے والے طیارہ میں صرف ایک ہی مسافر موجود رہا۔ ممبئی سے دبئی جانے والے ایک طیارے میں 19 مئی کو 40 سال کے بھاویش جاویری نام کے ایک ہی مسافر نے سفر طئے کیا تھا۔ اس کے تین دن بعد اوسولڈ روڈریگز نام کے ایک دیگر شخص نے ائیر انڈیا کے طیارے میں ممبئی سے دبئی کا سفر اکیلے ہی کیا تھا۔
واضح رہے کہ کورونا وبائی مرض کے بعد سے طیارے پر سفر کرنے والے مسافروں کی تعداد میں کمی آئی ہے۔
